Gabuan me fanellat, priten gjoba për vlonjatët

 

Në adresë të klubit të Flamurtarit pritet që të vijë një gjobë e majme, për shkak se në ndeshjen e parë kundër Madhëruellit, javën e kaluar nuk janë respektuar disa kritere të UEFA-s. Sipas të deleguarve të këtij institucioni në atë ndeshje, disa nga tifozët janë akomoduar në një pjesë të tribunës që nuk ishte e pajisur me stola, ndërkohë që rregullorja e UEFA-s e ndalon një gjë të tillë. Ndërkaq, një tjetër gabim, sipas UEFA-s ka qenë edhe vendosja e reklamave në fanellë. Atje ku duhej të vendosej emri i lojtarit është vendosur logoja dhe emri i relkamës dhe kjo është e ndaluar. Në ndeshjen e ardhshme Flamurtari do të luajë me fanella të reja, por kjo nuk e shmang gjobën financiare. “U njoftuam për këtë punën e vendeve në stadium dhe kemi marrë vërejtje, por nuk besoj se do të ketë gjobë”, ka thënë shefi i klubit vlonjat, Geri Çipi. Sa i përket problemit të fanellave, ai ka mohuar gjithçka. “Nuk kemi dijeni për këtë gjë. Nuk besoj se kemi bërë ndonjë gabim me fanellat, ndaj jam i bindur se nuk ka asnjë penalizim në lidhje me këtë. Gjithsesi, kundër Madhëruellit të enjten do të luajmë me fanella të tjera”, është shprehur Çipi.