George Steiner vjen në shqip

Autor i mbi dymbëdhjetë librave, George Steiner njihet sot si një ndër mendjet e mëdha të kohës sonë

Eseist, kritik letrar, romancier, filozof amerikan, i lindur në Europë, George Steiner konsiderohet si një ndër figurat me ndikim më të madh në botën e sotme intelektuale. Disa prej veprave të tij si: The death of tragedy; After Babel etj, janë kthyer në pika referimi të kulturës bashkëkohore. Ky është libri i parë i George Steiner’it i përkthyer në shqip.

Për këtë libër, gazeta The New York Times ka shkruar se “Një libër i ri i Steiner’it përbën gjithnjë një ngjarje”. Ndërkaq, filozofi Edward Said është shprehur për librin kësisoj: “I mrekullueshëm.... një fenomen”.

Edhe The Washington Post e vlerëson autorin Steiner.

“Askush sot nuk shkruan dot për letërsinë si George Steiner. Të paktë janë ata që arrijnë elokuencën e mënyrës së tij të të shkruarit”, vlerëson kjo gazetë.

Libri “Në Kështjellën e Mjekërkaltrit (Shënime për një ripërcaktim të Kulturës)” është botuar nga botimet IDK, ndërsa është përkthyer në shqip nga shkrimtari dhe përkthyesi Bashkim Shehu. Libri ka 125 faqe.