Gjirokastër, sekustrohet drogë në një furgon, në kërkim poseduesit

Forca të shumta të policisë së Gjirokastrës janë angazhuar gjatë ditës së sotme në një operacion anti-drogë. Operacioni policor është fokusuar në aksin rrugor Jorgucat-Muzinë- Bictricë, aksion ky që është finalizuar me sekuestrimin e një sasie të konsiderueshme lënde narkotike. Ndonëse detajet lidhur me këtë operacion janë të cunguara, policia e Gjirokastrës bën të ditur se sasia e drogës u sekuestrua në një furgon, ndërsa janë shpallur në kërkim poseduesit e saj, të cilët kanë braktisur furgonin sapo e kanë identifikuar policinë, duke u drejtuar në drejtim të pyllit. Po sipas burimeve policore droga e sekuestruar vinte nga Lazarati dhe mendohet se kishte si destinacion Sarandën.
 

Po sot rreth orës 02.30 të mëngjesit, si rezultat i një tjetri operacioni policor Policia e Gjirokastrës ka sekuestruar 93 kilogramë mariuanë, ndërsa ka arrestuar një prej transportuesëve të lëndës narkotike, ndërsa janë shpallur në kërkim 3 persona të tjerë. Në cilësinë e provës materiale janë sekuestruar lënda narkotike, disa sende personale të personave të dyshuar dhe prova te tjera materiale që shërbejnë për dokumentimin me prova ligjore të autorëve të këtij trafiku.