Hagë, shtyrje e gjuqit për Haradinaj, nuk bëhet i gjallë dëshmitari PW-80

Mediat kosovare kanë bërë të ditur se dhe në përsëritjen e pjesshme të gjykimit kundër ish -kryeministrit të Kosovës dhe kundër ish-komandantit të UÇK-së Ramush Haradinaj, në Gjykatën e Hagës, as sot nuk është marrë në pyetje dëshmitari i fundit i aktakuzës. Dëshmitari mban pseudonimin PW-80, dhe as në seancën e sotme, prokurorët nuk mundën të siguronin praninë tij në gjykatë. Prokurorët, dëshmitarin PW-80, bashkë me Shefqet Kabashin i kishin konsideruar dëshmitarë shumë të rëndësishëm. Kabashi edhe gjatë gushtit të vitit të shkuar kishte refuzuar të dëshmonte në favor të gjykatës dhe për këtë shkak Gjykata e Hagës e kishte dënuar me një muaj burgim. Prokuroria ka kërkuar që gjykimi kundër Haradinajt të ndërpritet deri në maj ose dëshmitari PW-80 të merret në pyetje përmes videolidhjes. Në pjesën e mbyllur të gjykimit u tha se kundër dëshmitarti po zhvillohet një proces gjyqësor në vendin ku ai gjendet. Vendimi për shtyrjen eventuale të procesit kundër Ramush Haradinajt do të merret më vonë.