Hetimet- “Bankers Petroleum”: Bashkëpunojmë me autoritetet, mbi 36 mln dollarë ende të pashlyera te Tatimet

“Bankers Petroleum” ka reaguar pas hetimeve të Prokurorisë së Fierit, sipas së cilës, kjo kompani ka shmangur tatimet për 20 vite, duke i shkaktuar buxhetit të shtetit një humbje që vlerësohet në disa miliona euro.

Kjo kompani shprehet se do të bashkëpunojë me autoritet shqiptare, teksa shton se kanë ende mbi 36 milionë dollarë, rimbursime të TVSH-së, ende të pashlyera pranë autoriteteve tatimore. Kompania pretendon se që pas blerjes nga aksionerët e mëparshëm në vitin 2016, ekipi i ri drejtues “ka integruar ndershmërinë në çdo aspekt të operacioneve të BPA”L.

“Kemi dëshmuar angazhimin tonë ndaj partneritetit përmes prokurimeve më transparente, përputhshmërisë më rigoroze me ligjet dhe uljes së ndjeshme të mosmarrëveshjeve”, thuhet në reagim.

Sipas “Bankers Petroleum”, që prej vitit 2004, kjo kompani ka investuar 4.5 miliardë dollarë në ekonominë shqiptare.

“Kemi siguruar 83% të prodhimit kombëtar të naftës bruto; dhe kemi mbështetur më shumë se 1,500 familje lokale përmes punësimit cilësor. Jemi krenarë në mënyrë të përulur që kemi kontribuar me 730 milionë dollarë në rentën minerare (68.9% e totalit të Shqipërisë) për zhvillimin e sektorit energjetik, 40 milionë dollarë për mbrojtjen e mjedisit dhe 10 milionë dollarë për forcimin e komuniteteve – një trashëgimi që e konsiderojmë të shenjtë. Ndërkohë, kompania vazhdon të ketë të pashlyera pranë autoriteteve tatimore, rimbursime të TVSH-së (Tatimi mbi Vlerën e Shtuar) në vlerën mbi 36 milionë USD”, shprehet kompania.

Po ashtu, kompania thekson se është në proces të emërimit të një përfaqësuesi të lartë “për të garantuar një bashkëpunim të plotë dhe transparencë operacionale”.

“Në përgjigje të hetimeve të fundit rregullatore, BPAL dhe kompania jonë mëmë, BPL, janë të përkushtuara të bashkëpunojnë plotësisht me autoritetet shqiptare. Jemi në proces të emërimit të një përfaqësuesi të lartë për të garantuar një bashkëpunim të plotë dhe transparencë operacionale. Respektojmë dhe mbështesim të gjitha masat ligjore për të ruajtur standardet rregullatore dhe të integritetit në Shqipëri. Deri më tani, operacionet tona mbeten të qëndrueshme, ekipi ynë bazë është i plotë dhe aktivitetet tona të përditshme vazhdojnë pa ndërprerje të mëdha. Jemi të përkushtuar të vazhdojmë të shërbejmë klientët dhe partnerët tanë. Duke parë përpara, BPAL mbetet e vendosur në qëllimin e saj për të garantuar stabilitetin energjetik të Shqipërisë përmes operacioneve të besueshme, thellimit të rrënjëve në punësimin lokal dhe investimeve në komunitet, si dhe duke nderuar besimin që Shqipëria na ka dhënë që prej vitit 2004”, përfundon reagimi.

Sipas hetimeve të Prokurorisë, nga viti 2004 e deri në fund të vitit 2024, kompania ka deklaruar se ka dalë me humbje, duke shmangur në këtë mënyrë detyrimet tatimore. Në pranga janë vënë 9 persona, mes tyre edhe CEO aktual, shtetasi kinez Hongping Xiao, dhe ish-drejtuesja Leonidha Çobo, ndërsa 5 të tjerë, shtetas të huaj, janë shpallur në kërkim.

/rtsh.al/