Hoxhaj ngushëllon Sekretaren Clinton për vdekjen e Larry Rossin
Në emër të Qeverisë dhe qytetarëve të Republikës së Kosovës, Ministri Hoxhaj, në letër, i ka shprehur ngushëllimet më të sinqerta Sekretares Clinton dhe familjes Rossin, pas ndarjes së parakohshme nga jeta e mikut të madh të Kosovës, Larry Rossin.
Hoxhaj ka vlerësuar lartë figurën e diplomatit të shquar Rossin, i cili gjatë jetës dhe veprimtarisë së tij është shndërruar në një figurë të shquar të përpjekjeve të diplomacisë amerikane për triumfin e vlerave të lirisë dhe demokracisë në botë, e veçmas në rajonin tonë.
Ministri Hoxhaj po ashtu ka shprehur konsideratat më të larta dhe mirënjohjen e popullit të Kosovës për kontributin e Larry Rossin me angazhimin e tij për shumë vite në zgjidhjen e çështjes së Kosovës, më pas si Shef i parë i Zyrës Amerikane në Kosovë, si dhe në kohën e shpalljes së pavarësisë, si zëvendësshef i UNMIK-ut në Kosovë.
“Populli i Kosovës do ta përkujtojë me pietet të lartë figurën e Larry Rossin, i cili do të mbahet mend jo vetëm si mbështetës i pavarësisë së Kosovës, por edhe si një nga diplomatët që ka qenë pjesë e veprimeve konkrete për shtetndërtimin në Kosovë”, thuhet në telegramin e Ministrit Enver Hoxhaj.