I pari në Londër

Një pikturë e artistit shqiptar, Alfred Mirashi, që jeton në Firenze (Itali), u nderua me Çmimin e Parë në ekspozitën që, me rastin e Lojërave Olimpike, u mbajt në Londër.

Ekspozita, në të cilën morën pjesë piktorë nga mbi 80 shtete, u mbajt në Barbican Centre, dhe u financua nga qeveritë britanike dhe kineze.

Shqipëria në këtë ekspozitë u përfaqësua nga artisti shqiptar me origjinë nga Miloti, Alfred Mirashi, i cili aktualisht jeton në Itali. Piktura e tij, “Këndi Mesdhetar”, u nderua me çmimin e parë në këtë ekspozitë.

“Që të gjitha pikturat e mia i quaj ‘angolo mediterraneo’”, deklaroi Mirashi për televizionin Top Channel.

Ndryshe, Alfred Mirashi ka diplomuar në Milano, dhe studimet pasdiplomike i ka vazhduar në Angli. Deri tani ka pasur shumë ekspozita në Itali dhe në Londër, ndërkohë që së shpejti pritet të hap edhe një ekspozitë në Pekin.