IAEA vazhdon vizitën në Iran

Inspektorët bërthamorë të Kombeve të Bashkuara janë duke vazhduar vizitën në Iran, pas shqetësimeve në rritje mbi aktivitetin bërthamor të Teheranit.

Kjo është vizita e dytë në më pak se një muaj e inspektorëve të Agjencisë Ndërkombëtare për Energji Bërthamore (IAEA), të cilët shpresojnë të takojnë shkencëtarët atomikë të Iranit dhe të vizitojnë kompleksin ushtarak Parçin.

Ky i fundit dyshohet se strehon një strukturë sekrete bërthamore, që përdoret për programin bërthamor të Iranit, pretendime që hidhen poshtë nga Republika Islamike.

Inspektorët e IAEA-së kanë vizituar Parçinin në vitin 2005, por jo të gjitha zonat me interes brenda kompleksit.

Vizita e IAEA-së vjen pak ditë pasi Irani ka bërë publike ato që i quan "avancime në programin e tij bërthamor".

Ajo vjen po ashtu në kohën kur Republika Islamike ka nisur stërvitjet për mbrojtje ajrore në jug të vendit.

Ndërkohë, Ministria iraniane e Naftës ka tërhequr vërejtjen se ndërprerja e eksportit të naftës për Francën dhe Britaninë, mund të zgjerohet edhe ndaj vendeve të tjera të Bashkimit Evropian.

BE-ja i ka hedhur poshtë këto kërcënime.