Ibra: Vërshëllimat, “gjest dashurie”

“Dikush ka fishkëllyer dhe kjo është normale kur humbet një lojtar që nuk do ta humbësh. Tifozët ishin të qetë, jeta vazhdon.” Zllatan Ibrahimoviç i interpreton si një “gjest dashurie” vërshëllimat në drejtim të tij gjatë sfidës së të mërkurës midis Interit dhe Barcelonës.

Suedezi nuk u duk aspak i shqetësuar dhe pas ndeshjes, u përgëzua nga mediat spanjolle. “Ishte një ndeshje e madhe. Me pak më tepër fat mund të kishim shënuar dy ose tre gola,”- tha ish-sulmuesi zikaltër.

“Sidoqoftë – shton bra - për Barcelonën është një pikë e rëndësishme e marrë jashtë fushe.”

I pari aksion i rrezikshëm që u krijua nga skuadra katalanase u shpërdorua pikërisht nga Zllatan Ibrahimoviç: “E pata mundësinë për të shënuar, me pak fat, topi mund të kishte hyrë në rrjetë.”

Në fund, sulmuesi suedez jep një mendim në lidhje me ish-ekipin e tij: “Është një skuadër e fortë, lojtarët e rinj janë shumë të zot. Duhet të futen plotësisht në mekanizmat e skuadrës, por janë më të fortë se vitin e kaluar.”

Këto fjalë i kanë pëlqyer edhe Masimo Moratit. Një përqafim për të? “Po, e bëra, i përqafova të gjithë dhe ata ishin të kënaqur që më shikonin. E njëjta gjë edhe për mua.”