In memoriam Faruk Begolli

Me rastin e njëvjetorit të vdekjes së Faruk Begollit, nesër, më 23 gusht, Prishtina, rrethet e saj të kulturës, kujtojnë dhe nderojnë aktorin e paharruar. Nën kujdesin e ministrit të Kulturës, Valton Beqiri, Teatri Kombëtar i Kosovës në bashkëpunim meKosova Film, Teatrin Dodona, dhe familjen Begolli, zhvillohet ceremonia përkujtimore që nis në orën 11 në Teatrin Kombëtar me homazhin “In Memoriam” me muzikë klasike, me përshëndetjen e ministrit Beqiri. Prezantohet më pas monografia “Faruk Begolli” e Jeton Nezirajt, një botim trigjuhësh, shqip-anglisht-serbisht. Të pranishmëve do t’iu shërbehet në shenjë përshpirtje nga një gotë raki deri në orën 12 kur do të nisen për në varrezat e qytetit aty ku prehet aktori pas vdekjes më 23 gusht 2007.

Faruk Begolli (1944 - 2007) u lind më 1944 në Pejë. Studioi në Akademinë e Filmit dhe Teatrit në Beograd ku u diplomua më 1966. Si bashkëthemelues i degës së Aktrimi në Fakultetin e Arteve të Universitetit të Prishtinës, punoi si pedagog i lëndës së Aktrimit. Në vitet ‘90-të së bashku me Enver Petrovcin themeluan Teatrin “Dodona” në Prishtinë, ku u angazhua - në kushte të vështira të mungesës së lirisë së plotë – bashkë me studentët e tij me një repertor botëror si “Mbreti Lir” i Shekspirit, apo “Këngëtarja tullace” e Eugjen Joneskos. Ky lloj repertori i dha prestigj “Dodonës”. Përfshirja e Begollit jepte shanse për këtë.

Aktori, një emër i njohur në kinemanë e ish- Jugosllavisë, në vitet 70, krahas Bekim Fehmiut, interpreton gati në të gjithë filmat artistikë tëKosovaFilmit, si “Dashuria e parë”, “Si të vdiset”, “Era dhe Lisi”, “Kur pranvera vonohet”, “Proka”, deri tek prodhimet private të pas Luftës si “Etjet e Kosovës”.