“Integrimi mund të fitojë një vrull të ri”

Baronesha Ashton dhe Eurokomisioneri Fyle përshëndesin zgjedhjet parlamentare Bashkimi Europian përshëndet zgjedhjet parlamentare në vend. Përmes një deklarate për Chatrine Ashton dhe Stefan Fyle përgëzojnë qytetarët e Shqipërisë për zgjedhjet parlamentare të 23 qershorit që, sipas vlerësimit të tyre, u zhvilluan në mënyrë të rregullt

Dy ditë pas përfundimit të procesit të votimeve në Shqipëri ka reaguar edhe Brukseli. Delegacioni i Komisionit Europian në Tiranë publikoi pasditen e së martës (25.06.2013) një apel të Përfaqësueses së Politikës së Jashtme dhe të Sigurisë Cathrine Ashton dhe Komisionerit Stefan Fyle për Shqipërinë lidhur me ruajtjen e standardeve të BE dhe ato ndërkombëtare deri në finalizimin e procesit të numërimit të votave dhe shpalljes së rezultateve. Ashton dhe Füle përgëzojnë qytetarët e Shqipërisë për zgjedhjet parlamentare të 23 qershorit që, sipas vlerësimit të tyre, u zhvilluan në mënyrë të rregullt. “Tani duhet garantuar ndjekja e duhur e gjetjeve paraprake dhe konkluzioneve të Misionit Ndërkombëtar për Vëzhgimin e Zgjedhjeve. Ne dënojmë rastet e raportuara të dhunës dhe presim që këto incidente të hetohen plotësisht dhe autorët të dalin para drejtësisë”, thuhet në deklaratën e publikuar për media zyra e KE në Tiranë. Kur kanë mbetur pa u numëruar dhe rreth 10 përqind e 5508 kutive të votimit në të gjithë territorin e Shqipërisë BE-ja u ka bërë thirrje partive që të veprohet me frymë konstruktive për të mirën e popullit shqiptar. “Ne ju inkurajojmë që sapo të certifikohen rezultatet të krijohet menjëherë qeveria për trajtimin e sfidave të menjëhershme që ju presin për të garantuar që programi i reformave të vendit do të ndiqet fuqimisht dhe që procesi i integrimit evropian të mund të fitojë një vrull të ri”, përfundon deklarata e përbashkët e Përfaqësueses së Lartë Cathrine Ashton dhe Komisionerit të BE-së, Stefan Fyle. Një ditë më parë ekipi i përbashkët i vëzhguesve ndërkombëtarë, ku përfshiheshin Zyra e OSBE-së për Institucionet Demokratike dhe të Drejtat e Njeriut, Asambleja Parlamentare e Këshillit të Europës, dhe Asambleja Parlamentare e OSBE-së, publikuan në Tiranë një raport paraprak mbi ecurinë e procesit të zgjedhjeve parlamentare të 23 qershorit 2013. Vlerësimi i ndërkombëtarëve kishte në thelb cilësimin e votimeve si “konkurruese, me pjesëmarrje aktive të qytetarëve gjatë gjithë fushatës elektorale dhe respekt të mirëfilltë për liritë themelore”. Raporti vlerësonte pjesëmarrjen në zgjedhje (sipas KQZ-së rreth 54 përqind), por kritikoi zvarritjet në procesin e numërimit të votave dhe shpalljen e rezultateve në 12 qarqet e vendit.