Interpol Tirana ekstradoi sot dy të kërkuar për vrasje

Dy persona, të shpallur në kërkim ndërkombëtar për vrasje nga drejtësia shqiptare janë ekstraduar nga  Zyra e Interpol Tiranës. Burime nga Drejtoria e Përgjithshme e Policisë së Shtetit bënë të ditur sot se  Zyra e Interpol Tiranës ekstradoi  nga Frankfurti, Gjermani, shtetasin  Joni  Lamaj nga Tepelena, i shpallur në kërkim pasi Gjykata e Vlorës,  ka vendosur ndaj tij masën e sigurisë së "arrestit  me burg" për kryerjen e veprës penale të "vrasjes me paramendim". Lamaj akuzohet se ka vrarë me armë zjarri shtetasin Jani Gjikuria,  në shkurt të vitit 2005  në fshatin Dhërmi,Vlorë. Gjithashtu u realizua ekstradimi nga  Brukseli, Belgjikë, i shtetasit Shaban  Kokaj nga Tropoja, i dënuar në vitin 1991 nga Gjykata e Tropojës,  me 18 vjet burg, për  veprën penale të "vrasjes për motive të dobëta". Ky shtetas ishte shpallur fajtor dhe dënuar nga kjo Gjykatë,  për vrasjen me armë të ftohtë të  shtetasit Selamet Ndreu në vitin 1990 në Tropojë. Bëhet e ditur gjithashtu se arrestimi dhe më pas ekstradimi i këtyre personave në vendin tonë është  bërë  i mundur në sajë të bashkëpunimit të Interpol Tiranës me strukturat homologe të saj në Gjermani dhe Belgjikë.