Irani ka rrëzuar një fluturake amerikane?

Mediat iraniane njoftuan se forcat e armatosura të Iranit rrëzuan një aeroplan spiun amerikan pa pilot, pasi sipas tyre kishte shkelur hapësirën ajrore iraniane.

Njoftimet citojnë zyrtarë të ushtrisë, të cilët theksuan se aeroplani spiun nuk është dëmtuar rëndë dhe është në duart e ushtrisë iraniane.

Mediat iraniane theksuan se ushtria e rrëzoi aeroplanin amerikan në lindje të vendit, por në njoftime nuk thuhet kur ka ndodhur incidenti.

NATO njoftoi se operatorët humbën javën e kaluar kontrollin e aeroplanit pa pilot, që po fluturonte me një mision mbi Afganistanin perëndimor. Aleanca tha se aeroplani të cilit i referohet Irani mund të jetë aeroplani i humbur, pasi zyrtarët e NATO-s nuk e kanë përcaktuar ende vendndodhjen e tij.

Në korrik, mediat shtetërore iraniane cituan një ligjvënës iranian, që tha se Irani kishte rrëzuar një aeroplan spiun amerikan pranë objektit bërthamor në Fordu, por Garda Revolucionare më pas e mohoi njoftimin.