Irani propozon kompromis për programin e tij bërthamor

Ministri iranian i Punëve të Jashtme, Ali Akber Salehi, propozoi kompromis për programin kontestues bërthamor të Teheranit, në këmbim për dërgesa të uraniumit të pasuruar nga vendet e treta.

Në intervistën dhënë revistës gjermane "Spiegel", Salehi sërish deklaroi se vendi i tij ka të drejtë të shfrytëzojë teknologjinë bërthamore për qëllime paqësore.

"Nëse pranohet e drejta jonë për pasurim të uraniumit, ne jemi të gatshëm për kompromis.

Vullnetarisht do ta kufizojmë nivelin e pasurimit të karburantit bërthamor" tha Saleh.

Në këmbim të kësaj, Irani duhet të marrë garanci se do ta marrë karburantin e domosdoshëm prej vendeve të tjera.

Zgjidhje e ngjashme u propozua nga vendet perëndimore në negociatat paraprake me Iranin, theksuan mediat franceze.

Javën e kaluar, presidenti Mahmud Ahmadinejad, tha se Irani nuk do të heqë dorë nga programi i tij bërthamor edhe përkundër sanksioneve të imponuara nga Perëndimi, që si rezultat e kanë zhvlerësimin drastik të valutës iraniane, e cila për një javë humbi 40 për qind nga vlera e saj në krahasim me valutat kryesore botërore.