Islamistët kundër presidentit të ri të Somalisë

Ashtu siç edhe pritej, grupi terrorist somalez, Al Shabab, që ka lidhje të forta me Al Qaedan, është shprehur kundër presidentit të sapozgjedhur të vendit, Hassan Sheikh Mohamed, i pari i dalë nga vota popullore në këtë vend.

Zëdhënësi i Al Shabab, Sheikh Ali Mohamed Rage, tha për agjencinë e lajmeve AFP se organizata që ai përfaqëson nuk ka asgjë personale kundër presidentit të ri, por është kundër gjithë sistemit.

“Procesi elektoral dhe zgjedhjet janë një projekt i armikut të Somalisë. Ne jemi kundër këtyre. Nuk kemi asgjë me presidentin e ri, por me sistemin”, tha zëdhënësi i Al Shabab.

Hassan Sheikh Mohamed u zgjodh dhe u shpall president i vendit në përfundim të një procesi të gjatë dhe të vështirë zgjedhor.

Në rrethin e parë ishin disa kandidatë për postin më të lartë në udhëheqjen e vendit, por askush nuk mundi të sigurojë mbi 30 për qind të elektoratit, ashtu sikundër e kërkonte legjislacioni vendas. Pas balotazhit, Mohamed u shpall fitues.

Tashmë sfidat e tij janë të shumta, e një ndër to është edhe vënia nën kontroll e gjithë territorit të vendit, pjesa më e madhe e të cilit në jug kontrollohet nga Al Shabab.