Itali, qeveria Monti do të përballet me votëbesimin në Parlament

Qeveria italiane e Kryeministrit Mario Monti përballet me një votëbesim kyç në parlament, ndërsa po përpiqet të miratojë një projekt të madh kursimesh.

Kabineti Monti do të rrëzohet nëse parlamenti nuk do të aprovojë planin e reduktimit të investimeve me 33 miliardë euro, por ekspertët thonë se kjo ka shumë pak gjasa që të ndodhë dhe se plani duhet të miratohet pa shumë vështirësi nga deputetët.

Monti, i ardhur në krye të shtetit italian në nëntor, udhëheq një qeveri specialistësh, të destinuar për nxjerrjen e vendit nga kriza ekonomike. Ai është një financiar i shumëvlerësuar në Europë, ndërsa ka mbajtur më parë edhe detyrën e Komisionerit të Konkurrencës në BE.