Itali, shuhet presidenti i Interit, Xhaçinto Faketi

Ish-kapiteni i përfaqësueses së Italisë dhe i Interit të Milanos, Xhacinto Faketi është ndarë dje nga jeta, bëri të ditur të hënën klubi i Serisë A. 64-vjecari Faketi, i cili ishte aktualisht president i Interit, ka vuajtur nga një sëmundje e rëndë për disa javë radhazi, para se të ndërronte jetë. Një figurë popullore dhe e respektuar gjerësisht në futbolli italian, Faketi ishte kapiten i asaj skuadra të Interit të madh, të mbiquajtur "Grande Inter", e cila pati një sukses të konsiderueshëm në vitet 1960-të. Ai fitoi katër tituj të kampionit të Italisë dhe dy të kampionit të Evropës me Interin, me fanellën e të cilit ai luajtur plot 476 ndeshje në Serinë A.
Faketi luajti 94 ndeshje me fanellën e skuadrës përfaqësuese të Italisë, në 70 prej të cilave ai mbajti shiritin e kapitenit, duke fituar kurorën e Kampionatit Evropian të 1968-s dhe duke u shpallur nënkampion i botës në Botërorin e 1970-s. Pasi kreu detyra të ndryshme te Interi, pas tërheqjes nga futbolli i luajtur, ai u zgjodh president i klubit në janar të 2004-s, duke u bërë i pari lojtar që kryen këtë detyrë në historinë e Interit. "Ai ishte një figurë e madhe, si në fushën e blertë, ashtu edhe jashtë saj", - deklaroi dje për Faketin ish-shoku i tij i skuadrës te Interi dhe përfaqësuesja e Italisë, Sandro Macola.
"Ai ishte një shok i mrekullueshëm skuadre dhe një figurë autoritare në gjirin e saj, sepse ishte gjithnjë gati të luftonte deri në fund, - shtoi Macola. - Faketi ishte thjesht madhështor." Ndërkaq, Xhani Rivera, një nga legjendat e rivales bashkëqytetase të Interit, Milani, gjatë viteve më të mira të Faketit, kishte gjithashtu fjalët më të mira për një kundërshtar dhe mik të cmuar. "Ai ishte një person i mrekullueshëm, madje shumë më tepër në nivelin njerëzor sesa në atë sportiv, - tha Rivera. - Ne kaluam shumë vite bashë dhe vazhduam të takoheshim rregullisht edhe pasi e lamë futbollin, sepse marrëdhëniet tona ishin shumë të forta."
Kurse Dino Zofi, kapiteni i Italisë, kampione e botës më 1982-shin, shtoi: "Kam kujtime të paharrueshme me Xhacinton. Sepse kemi luajtur për shumë vjet së bashku në skuadrën përfaqësuese. Ishte një njeri i mrekullueshëm dhe nuk kishte asnjë mundësi për të mos e pëlqyer si karakter", - tha ish-portieri i Juventusit. "Ai ishte kapiteni i brezit tonë", - ish-sulmuesi i Italisë, Xhixhi Riva, tashmë një drejtues në Federatën Italiane të Futbollit. "Ai ishte një njeri i ndershëm, i cili, fatkeqësisht, na la shumë shpejt, - vijoi Riva. - Ne kishim një marrëdhënie të shkëlqyer, sepse ai e dinte që mund të mbështetej tek unë, ashtu sikundër unë mund të mbështetesha te ai. Unë kam humbur një mik dhe një shok në shumë aventura të mrekullueshme."