Italia perfaqesuese e Shqiperise

Italia dhe Shqipëria kanë firmosur një marrëveshje të përfaqësimit diplomatik, ku shtetet marrin përsipër perfaqësimin dhe mbrojtjen konsullore në ato vende apo organizata ndërkombëtare ku njëra nga palët nuk ka përfaqësim diplomatik.

Më së shumti, do t’i takojë Italisë të përfaqësojë interesat e Shqipërisë për sa kohë ka një rrjet më të shtrirë diplomatik në mbarë globin.

“Është një marrëveshje që i jep mundësi Shqipërisë të rrisë përfaqësimin në ato zona ku nuk është e përfaqësuar. Vendosja e ambasadave të Italisë në funksion të diplomatëve tanë na jep mundësi të aplikojmë një diplomaci për vendosjen e marrëdhënieve dypalëshe me vendet e gjithë botës”, ka deklaruar ministri i Jashtëm shqiptar Edmon Haxhinasto, pas nënshkrimit të marrëveshjes me homologun Franco Frattini.

Ky i fundit ka vlerësuar ndër të tjera se, edhe pse në Shqipëri ka një krizë politike, institucionet e vendit funksionojnë.

“U duhet shpjeguar qytetarëve se cfarë është kriza politike. Në Shqipëri mund të ketë konflikt politik, por Parlamenti dhe institucionet funksionojnë”, ka thënë Frattini.

Shefi i diplomacisë italiane do të vizitojë së shpejti Kosovën dhe për këtë arsye ka diskutuar me ministrin Haxhinasto edhe mbi raportin e reporterit të KiE, Dick Marty.

“Raportit të Marty nuk do t’i japim më shumë rëndësi sesa duhet. Proceset e rajonit nuk pengohen nga asnjë raport dhe me ministrin Frattini kemi rënë dakord për mbështetjen e Kosovës, në mënyrë që edhe ajo të ecë përpara”, ka shtuar Haxhinasto.