Jahjaga kthehet nga vizita në SHBA

Presidentja e Republikës së Kosovës, Atifete Jahjaga, të hënën është kthye nga vizita që zhvilloi në Shtetet e Bashkuara të Amerikës, ku pati një varg takimesh dhe aktivitetesh me rëndësi.

Siç njofton Zyra e Presidentes, Jahjaga mori pjesë në konferencën “Frontiers in Development”, të organizuar nga USAID, që u mbajt në Universitetin Georgetown në Uashington të SHBA-së.

Në panelin ku u diskutua për zhvillimin, sigurinë dhe demokracinë, Presidentja Jahjaga ishte së bashku me Presidenten e Liberisë, Ellen Johnson Sirleaf, atë të Malawit, Joyce Banda, administratoren e UNDP-së, Helen Clark, dhe ish-presidenten e Irlandës, Mary Robinson. Po kështu, Presidentja Jahjaga mbajti një fjalim në këtë konferencë.

“Gjithashtu, Presidentja Jahjaga u takua me administratorin e USAID, Rajiv Shah, pastaj me ambasadoren e SHBA-së për çështjet globale të grave, Melanne Verveer dhe me kongresisten dhe drejtuesen e Qendrës Woodrow Wilson, Janne Harman, me kryesuesen e nënkomitetit të Senatit të SHBA-së për Evropë, senatoren Jeanne Shaheen, me drejtoreshën e Fondit Monetar Ndërkombëtar, zonjën Christine Lagarde.

Gjatë vizitës në Iowa, Presidentja u prit nga gjenerali Timothy Orr, në Selinë e Forcave të Përbashkëta, në kampin ushtarak Dodge të Gardës Kombëtare të Iowa-s, si dhe nga prefektja e qytetit Johnston, zonja Paula Dierenfeld, zhvilloi një takim me guvernatorin e Iowa-s, Terry Branstad, ndërsa u takua edhe me përfaqësuesit e komunitetit të biznesit në Iowa.

Gjatë vizitës në SHBA, Presidentja Jahjaga u takua edhe me ish-të dërguarin e SHBA-së për statusin e Kosovës, ambasadorin Frank Wisner, si dhe me zëvendësshefen e misionit të SHBA-së në OKB, ambasadoren Rosemary DiCarlo”, thuhet në njoftim.