Jakshiq: Marrëveshjet e bëjnë Kosovën të pavarur

Nënkryetari i të ashtuquajturit Kuvendi i komunave serbe të Kosovës, Marko Jaksiq, ka kritikuar ashpër deklarimet e qeveritarëve të rinj të Serbisë, se do t’i pranojnë dhe do t’i zbatojnë të gjitha marrëveshjet që janë arritur në Bruksel në mes të ekipeve negociatore të Serbisë dhe të Kosovës.

Në një deklaratë për mediat lokale serbe në Mitrovicë, Jakshiq tha, se me zbatimin e marrëveshjeve të Brukselit, Kosova do të bëhet e pavarur.

“Gjatë fushatës parazgjedhore, krerët e SNS të Nikoliqit thoshin se do të luftojnë për anulimin e marrëveshjeve të Tadiqit e Stefanoviqit, sepse ato janë kundër interesave nacionale të Serbisë dhe antikushtetuese, ndërsa tani shëtisin nëpër Evropë, e për Kosovën nuk mendojnë fare. Nëse zbatohen marrëveshjet, sidomos ato për tabelat e regjistrimit të veturave, si dhe për integrimin e kufijve, atëherë definitivisht do të bie veriu i Kosovës. Si pasojë e zbatimit të marrëveshjeve do të jetë shteti i pavarur i Kosovës edhe ‘de fakto’, në teren”.

“Në pritjen e mbretëreshës Elizabeta merrte pjesë presidenti Nikolliq, por edhe kryeministri i Kosovës, Hashim Thaçi. Me udhëheqjen paraprake ishim mësuar me këso gjërash, por po çuditëm me këta të rinjtë, por edhe nuk po çuditëm, sepse Perëndimi për kohë të gjatë e dëshiron Kosovën e pavarur, ndërsa ne gabojmë sepse në vend që ta ruajmë territorin tonë, betohemi në BE”, ka thënë Jaksiq, i cili ka ripërsëritur se SNS-ja dhe vetë Nikoliqi dhe ata të koalicionit qeverisës e kanë gënjyer popullin serb.

“Dhe tani çfarë thonë ata, se do t’i pranojnë të gjitha marrëveshjet e nënshkruara të Borko Stefanoviqit me Edita Tahirin. Kjo do të thotë që Kosova edhe faktikisht do të jetë shtet i pavarur”, citon Zëri fjalët e Jaksiq, i cili e ka cilësuar këtë si tradhti kombëtare.