KLSH: Dëmi ekonomik në tatim-taksa në vitin 2008 arriti në 1.88 miliardë lekë

Administrata tatimore është treguar e paaftë për të mbledhur taksat nga subjektet e biznesit gjatë vitit 2008. Me humbje kanë qenë edhe degët e taksave vendore, situatë kjo që konfirmohet edhe nga raporti i fundit i Kontrollit të Lartë të Shtetit, sipas të cilit një shifër mjaft e lartë të ardhurash është regjistruar si dëm në buxhetin e shtetit. Nga një total prej rreth 4 miliardë lekësh si dëm efektiv, pothuajse gjysma, ose 1 miliard e 887. 6 milionë lekësh, është zbuluar nga kontrollet në vitin 2008 në 7 degët e tatimeve dhe në tri degë të taksave dhe të tatimeve vendore. Sipas raportit të KLSH-së, në degët e tatimeve kryesisht dëmet janë në formën e detyrime tatimore dhe penaliteteve për tatimfitim, TVSH, divident dhe tatim në burim, si dhe mosaplikim të gjobave për mosdorëzim në afat të bilancit financiar. Ndërsa në degët e pushtetit vendor, dëmet e vëna re janë kryesisht për moszbatim të procedurave ligjore në llogaritjen dhe arkëtimin e detyrimeve për taksat dhe tarifat vendore, për subjekte të kategorive të ndryshme të aktivitetit. Sipas raportit të KLSH-së, “ky dëm efektiv i përket veprimtarisë ekonomiko-financiare për periudhën kohore 2006-2007, si dhe 9-mujorit të vitit 2008, përcaktuar për çdo subjekt të kontrolluar në programet e kontrollit”. Por kjo është një situatë tepër shqetësuese parë nga këndvështrimi i monitoruesve. Fondi Monetar Ndërkombëtar sheh si mjaft të rrezikshme uljen e kreditimit të ekonomisë, si dhe mbledhjen e taksave nga qeveria. “Ulja e aktivitetit ekonomik mund të sjellë pakësim të mëtejshëm të grumbullimit të taksave. Këto aspekte po i shohim dhe i kemi identifikuar si rreziqe”, - është shprehur pak ditë më parë përfaqësuesi i FMN-së, Gerëin Bell. Sipas statistikave, krahasuar me 2007 të ardhurat nga TVSH-ja u rritën me rreth 19.3 miliardë lekë. TVSH-ja e mbledhur nga mallrat e importuara llogaritet 74,9 miliardë ose 593 milionë lekë më shumë se planifikimi, ndërsa TVSH-ja mbi mallrat dhe shërbimet brenda vendit llogaritet 32,16 miliardë lekë nga 32,5 miliardë lekë të planifikuara, me një mosrealizim rreth 403 milionë lekë.

19 Shkurt 2009