KOMENT – Trump sinjalizon hapje ndaj negociatave pas shpalljes së tarifave

UASHINGTON, 4 prill /ATSH-DPA/ – Presidenti i SHBA Donald Trump tha dje se ishte i hapur për negociata, pas njoftimit të tij për tarifa të reja gjithëpërfshirëse globale.

“Nëse dikush thotë se ne do t’ju japim diçka që është kaq fenomenale, për sa kohë që ata po na japin diçka është gjë e mirë”, tha Trump kur u pyet nëse do të merrte në konsideratë marrëveshjet me vendet e prekura.

”Tarifat do t’i japin SHBA-së fuqi të madhe për të negociuar”, shtoi presidenti amerikan.

Trump përmendi rastin e TikTok si shembull.

Sipas ligjit të SHBA, aplikacioni në pronësi kineze supozohej të shitej nga kompania e tij mëmë, ByteDance ose të dilte jashtë linje në SHBA deri më 19 janar.

Megjithatë, Trump dha një zgjatje 75-ditore, e cila skadon të shtunën.

“Ne kemi një situatë me TikTok ku Kina ndoshta do të thotë se ne do të miratojmë një marrëveshje, por a do të bëni diçka për tarifën?”, tha Trump në bordin e ”Air Force One”.

“Ne e vendosëm veten në vendin e shoferit. Nëse do t’i kishim kërkuar disa prej këtyre vendeve – pothuajse shumicës së këtyre vendeve – të na bënin një nder, ata do të kishin thënë ‘jo’. Tani ata do të bëjnë gjithçka për ne”, tha Trump.

Një zyrtar i lartë i administratës kishte deklaruar më herët se tarifat e reja gjithëpërfshirëse mbi importet nuk ishin për negocim.

Trump tha se ai pret që shumë kompani të zhvendosin prodhimin e tyre në SHBA.

“Mos harroni, nuk ka tarifa nëse ndërtoni fabrikën tuaj ose nëse prodhoni produktin tuaj, bëni produktin tuaj në SHBA”, theksoi ai.

Të mërkurën, Trump vendosi tarifa minimale prej 10% për shumicën e importeve në SHBA, por tarifa më të larta ndëshkuese janë të detyruara për shumë vende, në varësi të deficiteteve të tyre tregtare./  a.jor.