KQZ hap kutitë e Lezhës, 8 grupe me nga dy anëtarë do numërojnë votat

Komisioni Qëndror i Zgjedhjeve ka nisur rinumërimin e kutive të votimit të qarkut të Lezhës, sikundër u vendos një ditë më parë.

Janë ngritur 8 grupe numërimi, secili grup me nga 2 anëtarë për ta bërë këtë proçedurë edhe më të shpejtë.

Nuk është hera e parë që hapim kutitë, proçedura është e njohur. Ashtu si hapëm kutitë e para, numëruesit do të lexojnë kodet dhe administrata do të bëjë verifikimin- tha kryetarja e KQZ-së, Lefterie Lleshi.

Ndërkaq ditën e djeshme, Komisioni Qëndror i Zgjedhjeve ka vendosur zhvendosjen nga Lundra në ambjentet e këtij institucioni të 248 kutive të votimit të qarkut të Lezhës.

Gjithashtu, Komisioni Qëndror i Zgjedhjeve ka pranuar kërkesën e Partisë Republikane për hapjen e të gjitha kutive të qarkut të Shkodrës.

Përfaqësuesi ligjor i PR-së, Arian Madhi, pretendoi se procesi në këtë qark është manipuluar dhe për këtë ai kërkoi rinumërim të votave në këtë zonë zgjedhore.

Falsifikime të dukshme. Në 18% të QV kemi konstatuar parregullsi. Të ndërhyhet për të siguruar integritetin e procesit. Korrigjime në shpërndarjen e votave. Procesi i Shkodrës, dukshëm i manipuluar, u shpreh Madhi.

Më herët, përfaqësuesi i Partisë Republikane kishte kërkuar hapjen vetëm të 79 kutive të votimit të qarkut të Shkodrës për të cilat kjo forcë politike pretendonte se ka pasur manipulime.