Kacin: Serbia në BE, jo me ideologji çetnike

Raportuesi i Parlamentit Evropian për Serbinë, Jelko Kacin, tha se rehabilitimi eventual i Drazha Mihajloviç do të ishte “hap në drejtim të kundërt nga Bashkimi Evropian” dhe mund të dëmtojë imazhin e Serbisë.

“Rehabilitimi i gjeneralit Mihajloviç ndikon keq në proceset e integrimeve evropiane të Beogradit, meqë bëhet fjalë për një udhëheqës të lëvizjes kolaboracioniste që mundet vetëm t`i shkaktojë dëme imazhit të Serbisë”, tha Kacin për gazetën “Danas”. Ai tha se rehabilitimi eventual i Drazha Mihajloviç mund të krijojë raporte të veçanta negative me fqinjët, me shtetet që ishin “viktima të ideologjisë çetnike” dhe do pamundësonte pajtimin e mirëfilltë.

Kacin tha se e shqetëson “tentimi evident i ndryshimit të sistemit të vlerave” dhe shtoi se Evropa e pasluftës është ndërtuar në vlerat antifashiste, derisa rehabilitimi i Drazha Mihajloviç “është hap në drejtim të kundërt”.

Kundër rehabilimtimit të kësaj figure të Luftës së Dytë Botërore ka reaguar ditë më parë presidenti kroat Ivo Josipoviç.