Kacin: Strukturat paralele, jo përgjegjësi e Prishtinës

“Ndërprerja e financimit të strukturave paralele në veriun e Kosovës, do të bëhet hap pas hapi”, ka thënë raportuesi për Serbinë në Parlamentin Evropian, Jelko Kacin.
 

Kacin ka theksuar se deklarata e presidentit serb Boris Tadiç, se Serbia nuk do t`i shpërbëjë strukturat paralele, është bërë vetëm për opinionin e brendshëm në Serbi. “Mendoj se deklarata e tij ka qenë më shumë për opinionin e brendshëm, e në veçanti për liderët opozitarë të Serbisë”, është shprehur ai. Ndër të tjera Kacin ka theksuar se për shpërbërjen e strukturave duhet arritur një zgjidhje e jo të ndërmerren veprime të njëanshme.
 

“Nuk është në përgjegjësinë e Prishtinës të shpërbëjë dikë apo diçka. Është shumë më praktike dhe normale që financimi i këtyre strukturave të ndërpritet hap pas hapi”, shprehet eurodeputeti slloven, për të shtuar se duhet gjetur zgjidhja se si të integrohen këto struktura paralele në institucion.