Kampioni në Euro 2012 mund të fitojë 23.5 milionë euro

Kampioni në Euro 2012 mund të shpërblehet nga UEFA me 23.5 milionë euro nëse arrin të fitojë secilën prej gjashtë ndeshjeve, tri në takimet në grup dhe po aq në fazën eliminatore.

Fondi total i shpërblimeve do të jetë 196 milionë euro, 12 milionë euro më tepër se që ishte në evropianin e kaluar në Austri dhe Zvicër. Për kualifikim në Euro 2012, secila përfaqësuese tashmë është shpërblyer nga 8 milionë euro.

Çdo fitore në fazën e grupeve sjell bonus prej një milion eurosh, ndërsa barazimi vlen 500 mijë euro. Dy ekipet e para nga secili grup kualifikohen për në çerekfinale. Risi është se me një milion euro do të shpërblehet pozita e tretë në grupe, edhe pse ajo skuadër do të eliminohet nga gara.

Kjo është bërë në mënyrë që në rast se në xhiron e fundit veç dihen dy skuadrat e para në grupe, ekipet e tjera do të kenë motivim shtesë për përballjen e tyre. Fitoret në çerekfinale vlejnë dy milionë euro, ndërsa ajo në gjysmëfinale sjell tre milionë euro. Fituesi i finales do të përfitojë edhe 7.5 milionë euro, ndërsa finalisti i mposhtur, 4.5 milionë euro.