Karzai dënoi sulmin në xhami
Presidenti i Afganistanit, Hamid Karzai, ka thënë se sulmuesit e xhamisë në provincën Fariab janë “armiq të Islamit dhe njerëzimit”.
41 persona janë vrarë dhe mbi 50 të tjerë janë plagosur nga sulmi i së premtes. Shumica nga viktimat kanë qenë zyrtarë të lartë fetarë, që kremtonin Festën e Bajramit.
Përgjegjësinë për sulmin nuk e ka marrë ende askush.
Komandanti i forcave të udhëhequra nga NATO-ja në Afganistan, gjenerali John Allen, ka dënuar po ashtu sulmin.
Ai ka ndodhur në vazhdën e një sërë sulmesh vdekjeprurësve në javët e fundit, që kanë pasur në shënjestër ushtrinë afgane, policinë dhe zyrtarët qeveritarë.
Më herët, Karzai ka përsëritur thirrjen e tij që talebanët t’i bashkohen qeverisë.