Kërkoi heqjen e sekuestros, Apeli i GJKKO rrëzon kërkesën e Kryemadhit, nuk i kthehet telefoni
Gjykata e Apelit të Posaçëm ka rrëzuar kërkesën e ish-kryetares së LSI-së, që tashmë njihet me emrin Partia e Lirisë, Monika Kryemadhit për heqjen e sekuestros së një telefoni. Nëpërmjet një njoftimi, Apeli i GJKKO bën me dije se vendimi u dha sot (4 janar) me trup gjykues monokratik të përbërë nga gjyqtarja Igerta Hysi.
Hysi vendosi lënien në fuqi të vendimit të shkallës së parë, duke mos i kthyer telefonin Kryemadhit.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Igerta Hysi, sot më 04.01.2024, ora 09:30, shpalli vendimin mbi çështjen penale nr. 189 akti, datë 27.12.2023 regjistrimi, regjistruar mbi ankimin e ankueses M.K., me objekt: “Ankim ndaj vendimit nr. 481, datë 07.12.2023 të Gjykatës së Posaçme të Shkallës së Parë, që ka rrëzuar kërkesën e shtetases M.K. për heqjen e sekuestros dhe kthimin e sendit të sekuestruar (telefon i markës Iphone)”, dhe vendosi:-Miratimin e vendimit nr. 481, datë 07.12.2023 të Gjykatës së Posaçme të Shkallës së Parë për Korrupsionin dhe Krimin e Organizuar”, thuhet në njoftim.
/rtsh.al/