Klubi i Gazetarëve të Shëndetësisë firmos bashkëpunimin me MASH

Klubi i Gazetarëve të Shëndetësisë firmosi Memorandumin e Bashkëpunimit me Ministrinë e Arsimit, për të bashkëpunuar në fushën e edukimit shëndetësor në shkolla. Dokumenti u nënshkrua nga zv.ministrja e Arsimit, Nora Malaj, dhe kryetari i Bordit të KGSH-së, Albert Gjoka. “Qëllimi i memorandumit ka të bëjë me rritjen e informacionit për edukimin shëndetësor në sistemin arsimor në vend, duke përfshirë të gjitha nivelet e arsimit dhe të gjithë faktorët e përfshirë në proces: nxënës-mësues-prindër”, - thuhet në marrëveshjen e nënshkruar. Memorandumi synon shtimin e komunikimit mes dy palëve, organizimin e aktiviteteve të përbashkëta promovuese për edukimin shëndetësor, trajnimin e gazetarëve dhe përmirësimin e standardeve të informimit për shëndetin për moshat shkollore. Në këtë kuadër, zv/ministrja Malaj theksoi rëndësinë që Ministria e Arsimit po i kushton edukimit shëndetësor në shkolla. Ajo vuri theksin në promovimin e fushatave ndërgjegjësuese në drejtim të luftës dhe parandalimit të sëmundjeve të HIV/AIDS, drogës, alkoolit, duhanit etj. “Edukata shëndetësore dhe ajo seksuale, përfshirja e praktikave për një ushqim të shëndetshëm, parandalimi i shtatzanive të padëshiruara, futja e metodologjive për një të menduar të shëndetshëm apo rishikimi i kurrikulave me elementë bashkëkohorë drejt një shëndeti sa më të mirë, janë ndër prioritetet e punës sonë”, - pohoi zonja Malaj. Memorandumi i firmosur dje është e para marrëveshje institucionale e Klubit, që bën me një institucion të tillë dhe është e hapur për të vendosur bashkëpunime me institucione, organizata dhe shoqata që veprojnë në fushën e shëndetit publik, me synimin për përmirësimin e standardeve të raportimit dhe rritjes së komunikimit për një shoqëri të shëndetshme. Klubi i Gazetarëve të Shëndetësisë është krijuar më datë 25 shkurt 2011 dhe ka në përbërje të tij rreth 25 gazetarë, redaktorë dhe drejtues të mediave vizive dhe të shkruara.