Kodi, Arvizu e Wollfarth: Të respektohen afatet
Dy ambasadorët e akredituar në Tiranë, ai i SHBA-së Aleksandër Arvizu dhe i OSBE-së Eugen Wollfarth kanë kërkuar sot mbylljen Brenda afatit të reformës zgjedhore. Deklarata e tyre është bërë në tryezën me temë "Teknologjitë e reja në zgjedhje dhe administrimi i tyre”.
Në fjalën e tij ambasadori i SHBA-së Aleksandër Arvizu ka kërkuar nga partitë politike të respektohen afatet kohore për reformën zgjedhore në mënyrë që gjërat të mos lihen për në momentin e fundit. “Kodi aktual është bazë e mirë, por ka disa boshllëqe, të cilat duhen realizuar. Duhen respektuar afatet kohore që gjërat të mos lihen për në momentin e fundit. Respektimi i afateve do të bëjë të mundur që të mos i lihen përgjegjësitë palës tjetër dhe të sabotohen zgjedhjet e 2013-ës” ka theksuar Arvizu . Ai gjithashtu ka deklaruar se është e rëndësishm që palët të bëjnë kompromis në mënyrë që kodi zgjedhor të jetë afatgjatë.
Me të njëjtën kërkesë ka dalë edhe kreu i prezencës së OSBE-së, ambasadori Eugen Wollfarth. Sipas tij, duhet të adresohen gjithë propozimet e bëra nga OSBE/ODIHR për të mundësuar një reformë zgjedhore të standardeve më të mira.
Reforma zgjedhore është një proces kompleks. Është bërë progres, por ka ende punë për t`u bërë. Reforma zgjedhore duhet të mbyllet brenda afatit. Duhet rezultat cilësor dhe besim mes palëve politike. Palët duhet të adresojnë të gjitha rekomandimet e OSBE-së. Reforma zgjedhore është një proces që i përket klasës politike shqiptare” ka theksuar Wollfarth.
Ndërsa Kryeparlamentarja Topalli në fjalën e saj vlerësoi se që prej marrëveshjes së 14 nëntorit të vitit të kaluar është bërë përparim në shumë kapituj të kodit zgjedhor. “Ftoj forcat politike parlamentare dhe aktoreët e tjerë që të mundesojnë në kohën e duhur amendamentet e Kodit që plotësojnë rekomandimet e OSBE. Kjo reformë duhet të plotësojë boshlliqet si votimit familjar, bojkoti, vendosja e shenjtërisë së ligjit dhe jo urdhërit politik. Reforma zgjedhore është detyrë. Në rolin tim garantoj mbështetje të plotë për punën tuaj të përbahkët”, theksoi Topalli.