Konfirmohet lobi rus në OKB, Moska propozon Vuk Jeremiçin për kryetar të Asamblesë së Përgjithshme të OKB-së

Dy ditë pas vetos ruse dhe kineze në Këshillin e Sigurimit, për situatën në Siri, lobi rus tregon dhe njëherë se është mjaft i fortë në Organizatën e Kombeve të Bashkuara. Dhe këtë e ka treguar në vazhdimësi, pasi mjaft vendime të OKB-së kanë kaluar më parë në lupën e Moskës. E tillë është edhe kandidatura e ministrit të Jashtëm serb, Vuk Jeremiç, për kryetar të Asamblesë së Përgjithshme të Kombeve të Bashkuara, i cili ka marrë menjëherë miratimin e Moskës zyrtare. “Jam i sigurt se kandidimi do të jetë i suksesshëm dhe se Jeremiç do të zgjidhet”, ka deklaruar ambasadori i Rusisë në OKB, Vitali Çurkin. Duke folur me doza humori, Çurkin tha se zgjedhja e kryediplomatit serb në presidencën e ardhshme të Asamblesë së Përgjithshme “do ta trondiste organizatën”. Dy javë më parë Serbia ka emëruar ministrin e jashtëm Jeremiç si kandidat për kryetar të Asamblesë së Përgjithshme të Kombeve të Bashkuara ndërsa si rival ka ambasadorin e Lituanisë në OKB. Aktualisht, kryetar i Asamblesë së Përgjithsme të Kombeve të Bashkuara është përfaqësuesi i Katarit, Nasir Abdulaziz al-Nase. Ajo që kuptohet lehtë nga ky proces zhvillimesh në OKB është se lobi rus tashmë ndjehet komod pas shpalljes së aleancës anti –perëndim me Pekinin zyrtar.