Konflikti PD-PDK, Ndoka e shkarkon nga drejtor spitali, Berisha e emëron prefekt

Elbasan - Me urdhër të ministrit të Shëndetësisë është shkarkuar nga posti i drejtorit të Spitalit Rajonal të Elbasanit, kurse me firmën e kryeministrit Sali Berisha është vendosur në kolltukun e prefektit të qarkut. Dje, zv/ministri i Brendshëm, Ferdinand Pone, ka prezantuar të enjten si prefekt të ri të qarkut të Elbasanit, Shefqet Deliallisin, i cili për pak ditë u bë epiqendra e një konflikti midis Partisë Demokratike dhe Partisë Demokristiane. Në prezantim kanë marrë pjesë drejtorë të drejtorive me vartësi vertikale në qarkun e Elbasanit, kryetari i bashkisë, Qazim Sejdini, ai i Këshillit të qarkut, Ardian Turku, përfaqësues nga Ministria e Brendshme, si dhe deputeti i PD Aurel Bylykbashi. Para se të bënte prezantimin e prefektit të ri të qarkut, zv. ministri i Brendshëm, Ferdinand Pone, ka lexuar vendimin e Këshillit të Ministrave, ku me propozim të ministrit të Brendshëm, është vendosur që Rezart Kovaçi, ish-prefekt i qarkut të Elbasanit, lirohet nga kjo detyrë dhe Shefqet Deliallisi emërohet në vendin tij. Më pas Pone ka falënderuar ish-prefektin e qarkut, Kovaçi, për punën njëvjecare që ka bërë, ndërsa ka falënderuar prefektin e ri, Shefqet Deliallisi, për detyrën e re.

“Mendoj se të gjithë e kemi detyrë primare të vazhdojmë reformat dhe të forcojmë administratën publike, si instrument thelbësor i të drejtës publike për t’u shërbyer qytetarëve. Prioritetet e qeverisë shqiptare janë që Shqipëria të bëhet një shtet evropian. Gjej rastin të them se kjo klimë e mirë bashkëpunimi mes qeverisjes vendore dhe asaj qendrore është më e mira në këto 17 vjet pluralizëm”, - tha zv.ministri Pone.

“Në çdo rast dhe në çdo gjë, - vijoi ai, - ju duhet të niseni nga zbatimi rigoroz dhe korrekt i ligjit, si dhe nga shërbimi me efikasitet duke vendosur qytetarin në qendër të vëmendjes”.

Ndërsa prefekti, Rezart Kovaçi, i liruar nga kjo detyrë, ka uruar prefektin e ri të qarkut, si dhe ka falënderuar bashkëpunimin me administratën e prefekturës, si dhe me të gjithë kryetarët e qeverisjes vendore dhe drejtorët me vartësi vertikale në qarkun e Elbasanit.

Ndërkaq, prefekti i sapoemëruar në fjalën e tij përshëndetëse ka deklaruar:

“Falënderim i shpreh PD së Elbasanit dhe kryeministrit të Shqipërisë, z. Sali Berisha, për respektin që ka treguar për personin tim, duke më ngarkuar një detyrë kaq të rëndësishme. Të qenit prefekt i qarkut është nder, si dhe një detyrë e vështirë, pasi qarku i Elbasanit ka një shtrirje të madhe dhe me shumë probleme. Unë do të përpiqem me forcat e mia për ta justifikuar këtë vend me qëllim që ta çoj punën përpara”, - përfundoi Deliallisi.