Kongresi i Noterëve, Berisha: Reformimi i shërbimit, jetik për konsolidimin e drejtësisë

Lufta ndaj larjes së parave të pista është një luftë për siguri dhe noterët shqiptarë mund të japin një kontribut të jashtëzakonshëm në këtë drejtim. Kjo ka qenë deklarata e kryeministrit Sali Berisha në Kongresin e Noterëve shqiptarë. Kryeministri tha se noteria është një shërbim jetik për shtetin ligjor dhe dixhitalizimi i sistemit të noterisë rrit besimin e qytetarëve. “Lufta kundër larjes së parave të pista është një luftë për sigurinë e cila është më e para për çdo qytetar. Dhe është jetike. Ju garantoj se nuk ka rrugë më të sigurt për të parandaluar krizat ekonomike dhe për të shpejtuar zhvillimin dhe prosperitetin sesa përpjekja e qeverisë për garantimin e lirisë së tregut. Në këtë kontekst ju keni mundësi të kontribuoni në këtë pikë me nevralgjike të Shqipërisë”- nënvizoi Berisha.
Kryeministri ka garantuar noterët se qeveria shqiptare do të japë të gjithë mbështetën e duhur për të përmirësuar dhe reformuar këtë shërbim jetik për konsolidimin e drejtësisë shqiptare.
Në të njëjtën linjë ishte edhe ambasadori i OSBE-së në Tiranë, Eugen Woolfarth i cili tha se pozicioni i noterëve është një element kyç në konsolidimin e shtetit të së drejtës.
“Përmes pavarësisë së tyre noterët janë gardianët e të drejtave të tyre. Puna e noterit kontribuon shumë në reduktimin e mosmarrëveshjeve post-kontraktuale dhe kështu edhe në nevojën për t’iu drejtuar rrugëve ligjore në gjykata. Ajo redukton pasigurinë dhe kostot.
Reformat e ndërmarra nga Ministria e Drejtësisë për përforcimin e kompetencave të zyrave noteriale në lidhje me shërbimet e ofruara nga Zyra e Regjistrimit të Pasurive të Paluajtshme, janë inkurajuese”- theksoi Wollfarth
Ambasadori i BE-së, Ettore Sequi tha se shërbimi i noterisë ka një rol të rëndësishëm në konsolidimin e drejtësisë duke ndikuar në rrugën e integrimit të vendit drejt BE-së.
“Konsolidimi i sistemit të drejtësisë ndikon në rrugën e integrimit të Shqipërisë në BE dhe shërbimi i noterisë do të ndihmojë në konsolidimin e shtetit ligjor. Noterët duhet të kenë personalitet, pavarësi dhe integritet në punën e tyre dhe dixhitalizimi i sistemit është një ndihmesë për punën e noterëve”- tha Sequi.
Ndërkaq ministri i drejtësisë Eduard Halimi ka prezantuar reformën noteriale dhe mënyrën se si do të funksionojë tashmë sistemi “one stop shop”. “Sistemi i përpunimit të automatizuar të të dhënave që sapo kemi ndërtuar me bazë ONE STOP SHOP për noterët noterët është sistem me tre fitues, qytetarët, biznesin dhe shtetin fiskal, i njohur ndryshe si tree win. Tashmë reformat në sistemin e noterisë janë të pandalshme. Vetëm brenda pak javëve do çelim tenderin edhe për krijimin e regjistrave dixhital duke i dhënë fund epokës së dokumenteve, letrave e regjistrave të pluhurosur të noterëve. Çdo gjë do të jetë elektronike.
Po sot, Ministri Halimi u dekorua nga Unioni Ndërkombëtar i Noterëve për reformat dhe dinamizmin e treguar prej tij në konsolidimin e sistemit të drejtësisë.