Kosova përballet me vështirësi në procesin e liberalizimit

Në tryezën e organizuar nga Grupi për Studime Juridike dhe Politike, u diskutua rreth procesit të liberalizimit të vizave në Kosovë. Në këtë tryezë u theksua se Kosova ende përballet me vështirësi në procesin e liberalizimit, duke pasur parasysh dinamikën e institucioneve në plotësimin e kushteve që dalin nga Udhërrëfyesi për Vizat.

Përveç tejkalimit të barrierave politike, sidomos atyre që vijnë nga jashtë, Kosova duhet të jetë e përgatitur mirë për të adresuar reformat e politikave të brendshme. Këto konstatime dolën në tryezën e organizuar nga Grupi për Studime Juridike dhe Politike, me temën “të arriturat, sfidat dhe dinamika e institucioneve të Kosovës në plotësimin e kushteve që dalin nga Udhërrëfyesi për liberalizimin e vizave”.

Dren Doli, nga Grupi për Studime Juridike dhe Politike, tha se procesi i liberalizimit është shumë më kompleks se në vendet tjera, duke marrë parasysh se Kosova ka pranuar një udhërrëfyes me kritere shumë të ngjeshura.

Ndërkaq, zëvendësministri i Ministrisë për Integrime Evropiane, Gëzim Kasapolli, tha se pavarësisht kritereve të shumta, Kosova ka arritur progres të konsiderueshëm në këtë proces, raporton RTK.

Në këtë tryezë u theksua se brenda dy javësh do të fillojë një fushatë për vetëdijesimin e qytetarëve për procesin e liberalizimit të vizave. Sepse, qytetarët do të kenë mundësi të udhëtojnë në Evropë pa viza, vetëm atëherë kur vërehen trende pozitive të uljes së kërkesave për azil kërkues në vendet e Bashkimit Evropian./Indeksonline/