Kosovarët braktisin Ulqinin për plazhet shqiptare

Turistët kosovarë këtë verë po preferojnë më shumë plazhet shqiptare sesa Ulqinin në Malin e Zi. Kreu i Shoqatës së turizmit kosovar KOTAS, Zekë Çeku, pohon për Televizionin Klan se me hapjen e autostradës Rrëshen-Kalimash, numri i pushuesve kosovarë në Shqipëri pritet të jetë më i lartë se një vit më parë. Sipas tij, megjithëse autostrada që na lidh me Kosovën, i shërben edhe plazheve malazeze, pasi shkurton kohën e udhëtimit të turistëve kosovarë drejt tyre, këta të fundit po zgjedhin të pushojnë në Shqipëri. Gjatë fundjavës në tunelin e Kalimashit numërohen deri 12 mijë automjete, pjesa dërmuese me targa kosovare, pra turistë kosovarë që nëpërmjet kësaj arterie, zbresin drejt plazheve shqiptare nga Velipoja në Sarandë.