Kosovë, Haxhinasto takon presidentin Pacolli

Në ditën e dytë të vizitës së tij në Kosovë, ministri i jashtëm shqipta Edmond Haxhinasto është takuar me presidentin kosovar Behgjet Pacolli.

Në takim shefi i diplomacisë shqiptare, Edmond Haxhinasto theksoi se pavarësisht kontestimit që dikush i ka bënrë zgjedhjes së Pacollit si president, ai e respekton vullnetin e deputetëve të cilët votuan për presidentin e ri të Kosovës.

Nga ana e tij Presidenti kosovar Pacolli falënderoi ministrin Haxhinasto dhe pararendësit e tij për punën shumë të madhe që kanë bërë për sigurimin e një numri sa më të madh të njohjeve për shtetin e ri të Kosovës. Ai shfaqi shpresën se diplomacia e Shqipërisë do të vazhdojë të punojë në këtë fushë dhe do të shtojë edhe më shumë angazhimet, si dhe theksoi nevojën e krijimit të një agjende të përbashkët angazhimesh, në mënyrë që Kosova të shtojë sa më shumë numrin e njohjeve, por edhe të arrijë sa më shpejtë të bëhet pjesë e mekanizmave ndërkombëtarë, një synim ky i përhershëm i popullit dhe institucioneve të Republikës së Kosovës.

Pas takimit me Pacollin, shefi i diplomacisë shqiptare bëri nderime tek varri i presidentit Ibrahim Rugova. Ai tha se është obligim i secilit të nderoi figurën e Rugovës mbi idenë e të cilit, siç u shpreh ai, po ndërtohet shteti i Kosovës.

Të shtunën pasdite Haxhinasto do të vizitojë memorialin dhe familjen Jashari në Prekaz.

Ndërkohë Haxhinasto po qëndron në Kosovë me ftesë të ministrit të Punëve të Jashtme të Kosovës, Enver Hoxhaj.