Kosovë/ Rezultatet paraprake të KQZ-së, 20 komuna në balotazh

Komisioni Qendror i Zgjedhjeve në Kosovë, ka dhënë rezultatet paraprake të fituesve në zgjedhjet lokale të datës 15 nëntor. Sipas këtyre të dhënave, pas numërimit të votave në shumicën e qendrave të votimit, 20 komuna nga 36 që ka gjithsej Republika e Kosovës, do të shkojnë në balotazh. Lajmi është konfirmuar nga kryetarja e KQZ-së, Nesrin Lushta. Në pjesën më të madhe të këtyre komunave që do të zhvillohen sërish zgjedhje, përqindjen më të lartë të votave e ka Partia Demokratike e Kosovës, duke udhëhequr në 13 komuna. Në 7 komuna, konkurohet mes Lidhjes Demokratike të Kosovës dhe Aleancës për Ardhmërinë e Kosovës. Në pjesën tjetër të komunave që tashmë janë shpallur fituesit, PDK-ja e drejtuar nga kryeministri Hashim Thaçi ka siguruar fitoren në 5 komuna. AAK-ja e Ramush Haradinajt 4 të tilla, ndërsa Lidhja Demokratike e Kosovës ka marrë 3 komuna, duke përfshirë këtu edhe Prishtinën, për të cilën është bërë gara më e fortë. Nga ana tjetër, komuniteti serb ka marrë 3 komuna, ndërsa ai turk një komunë. Ndërkohë, kryetarja e KQZ-së, Lushta ka rikujtuar se këto rezultate mund të pësojnë ndryshime, pasi aty nuk përfshihen votat me kusht, dhe se në disa vendvotime ende nuk është bërë numërimi i votave.