Kosovë/ Sejdiu-Thaçi, apel për të dalë në votime

Presidenti Fatmir Sejdiu ka hedhur votën e tij dhe njëherësh i ka bërë apel serbëve që të marrin pjesë në zgjedhjet lokale. "Kjo është një ditë e madhe dhe e rëndësishme për Kosovën. Apeloj në veçanti për komunitetin serb, por edhe për gjithë kosovarët që të marrin pejsë në zgjedhje", tha Sejdiu. Presidenti kosovar vlerësoi klimën pozitive elektorale në vend dhe zhvillimin e procesit deri tani. Fatmir Sejdiu përsëriti gatishmërinë dhe vendimin e qeverisë së Kosovës për një proces tranparent dhe të ndershëm.
Më herët kryeministri Hashim Thaçi dhe kryetari i Partisë Demokratike të Kosovës i shoqëruar nga bashkëshortja e tij ka votuar në shkollën "Faik Konica" në Prishtinë për zgjedhjet lokale. Kryeministri kosovar i ka bërë apel qytetarëve të dalin dhe të marrin pjesë në votimet për zgjedhjet lokale. "Sot është një ditë e rëndësishme për Kosovën , një ditë feste. Për të arritur në këtë ditë kemi punuar të gjithë. Kemi punuar për të pasur zgjedhje me standarde", tha kryeministri. Hashim Thaçi tha se komunitetet në Kosovë janë të barabartë. Ai u shpreh i sigurtë se procesi zgjedhor do jetë i suksesshëm.