Kosovë, reduktohet EULEX-i

Forca të Eulexit ne Kosove / Foto arkiv

 Gjyqtarët, prokurorët, hetuesit dhe zyrtarët e tjerë të EULEX-it janë vënë para sfidave personale. Deri më 15 qershor, ata duhet t`i nënshkruajnë kontratat e reja me misionin e BE-së. Bashkimi Europian po aplikon disa politika të reja në raport me shumën e ofruar në kontrata, kritere që kanë bërë që shumë gjyqtarëve, prokurorëve, hetuesve dhe zyrtarëve të tjerë të misionit t`u afrohen rroga më të vogla, shkruan sot Koha Ditore.
Sipas gazetës, shkurtimet buxhetore nuk janë zvogëlimi i vetëm që prej 15 qershorit të këtij viti do ta përjetojë misioni më i madh i BE-së. EULEX-i do të jetë për rreth 40 për qind më i vogël në staf dhe do të ketë prezenca zyrtare vetëm në dy rajone: në veri të Kosovës dhe në Prishtinë.

Deri më tani, EULEX-i ka pasur të drejtë të punësojë deri në tre mijë zyrtarë, 1 mijë e 900 ndërkombëtarë dhe 1 mijë e 100 vendës, ndërkohë që, prej 15 qershorit do të ketë të drejtë të punësojë për 40 për qind më pak zyrtarë ndërkombëtarë.

Gjithsesi, burime të gazetës kanë bërë të ditur se zvogëlimi prej 40 për qind nuk do të ketë të njëjtin efekt në praktikë, pasi misioni asnjëherë nuk i ka arritur shifrat maksimale të stafit ndërkombëtar dhe rrjedhimisht i bie që stafi që ka qenë më i vogël, të reduktohet më pak.