Kosovë/Kamioni hyn në shtëpi, vdesin 3 fëmijë

Tragjedia ka marrë jetën e tre fëmijëve në lagjen Suhodoll të Mitrovicës. Një shofer kamioni i kompanisë që ishte duke punuar në ndërtimin e shtëpive në lagjen Kroi i Vitakut, për shkak të një defekti ka humbur kontrollin dhe ka goditur një shtëpi banimi. Si pasojë kanë gjetur vdekjen e menjëhershme tre fëmijë dhe janë plagosur gjashtë persona tjerë si dhe shoferi i kamionit.
Në atë moment, në shtëpinë të familjes Ahmeti kanë qenë rreth tetë persona. Nga goditja e fuqishme e kamionit pothuajse të gjithë pjesëtarët e kësaj familje kanë pësuar plagosje të rënda, ndërsa për Blerim Ahmetin, Faton dhe Rifat Aliun, prej moshës 7 deri 14 vjeç ajo ishte fatale.
Bajram Rexhepi, Kryetar i komunës së Mitrovicës, i pikëlluar nga kjo ngjarje tragjike i ka shprehur ngushëllimet familjarëve që kanë humbur fëmijët. Me këtë rast, Rexhepi tha se e hëna do të shpallet ditë zie në Mitrovicë.
Zëdhënësi i Policisë së Kosovës për rajonin Mitrovicës, Besim Hoti tha se kjo tragjedi është shkaktuar si pasojë e defekteve teknike në kamion duke mos I dhënë mundësi drejtuesit të frenojë para një kthese të forte dhe si pasojë ka përfunduar në shtëpinë në të cilën gjendeshin së paku tetë pjesëtarë të familjes.