Kreu i qeverisë në audiencën private të Shenjtërisë së Tij Papa Benedikti i XVI

Kryeministri Sali Berisha sot vizitë në Romë, i ftuar nga Internacionalja e Demokratëve të Qendrës, ku marrinpjesë kryeministrat e Spanjës, Irlandës, Hungarisë dhe Greqisë

Kryeministri Sali Berisha zhvillon sot një vizitë në kryeqytetin italian, Romë ku do të marrë pjesë në takimin e liderëve të Internacionales së Demokratëve të Qendrës. Në këtë takim, i cili zhvillohet çdo dy vjet, marrin pjesë krerët e partive anëtare të CDI-së nga 75 vende të botës. Në këtë takim, i cili drejtohet nga Presidenti i Internacionales së Demokratëve të Qendrës, Pier Ferdinando Casini, do të marrin pjesë liderë politikë nga vendet anëtare, ndër të cilët kryeministrat e Spanjës, Irlandës, Hungarisë dhe Greqisë.
I ftuar i veçantë në punimet e Internacionales së Demokratëve të Qendrës do të jetë Kryeministri italian, Mario Monti, i cili, për nder të krerëve të qeverive pjesëmarrëse në takim, do të shtrojë një drekë të veçantë.
Në fokus të këtij eventi do të jetë rëndësia e ndërtimit të konsensusit dhe qëndrimit të përbashkët mes të gjitha partive politike anëtare të Internacionales së Demokratëve të Qendrës, në kuadrin e momenteve të vështira që po kalon Evropa, Afrika  e Veriut, Lindja e Mesme dhe rajonet e tjera të botës.
Ditën e shtunë datë 22 shtator, Kryeministri Berisha do të marrë pjesë në audiencën private që Shenjtëria e Tij Papa Benedikti i XVI do të japë për të ftuarit e Internacionales së Demokratëve të Qendrës, në rezidencën e tij verore në Kështjellën Gandolfo.