Kryeministri Berisha në Patos: Parku industrial, gjenerator i fuqishëm i punësimit i për qytetin

-Këto katër  vite në qytetin dhe rrethin e Fierit, kemi investuar rreth 400 milion euro dhe kemi ndërtuar dhe rindërtuar mbi 200 kilometra rrugë, nga të cilët 180 kilometra janë rrugë rurale, 27 ujësjellës, 24 qendra shëndetësore, 38 shkolla. 

-Në energji  janë investuar rreth 250 milion euro, në katër  vitet  që vijnë  qeveria do të investoje 6 herë më shumë

-Në këto vite ne kemi financuar 1200 hektarë dru frutore dhe sera, ju garantoj se në vitet që vijnë ne do të financojmë së paku 6 mijë hektarë ullishta, vreshta dhe sera.

Kryeministri Berisha ishte sot paradite në qytetin e Patosit, ku prezantoi zotin Dilaver Kamberi si kandidat  për kryetar bashkie të koalicionin  “Aleanca  për  Qytetarin”.

Kryeministri e  vlerësoi kandidaturën e zotit Kamberi  si një nga njerëzit më të  suksesshëm të  këtij qyteti , biznesmen dhe menaxher i shkëlqyer, i cili do të vihet në shërbim të qytetarëve.

 Qeveria, tha kryeministri Berisha, do të bëjë gjithçka që me zotin Kamberi,  në katër  vitet  që vijnë të shndërrojmë Patosin  në një qytet të zhvilluar, në një epiqendër  të fuqishme të  prodhimit të shërbimeve më të mira.  

“Zotimi ynë për ju, është patozi 24 orë ujë në të gjithë territorin e tij, po ndërtojmë kolektorin e ujërave të zeza, si dhe të gjitha rrugët dhe rrugicat e qytetit.  Do të rindërtojmë stadiumin e qytetit në mënyrë që aktivitetet  sportive  të njohin nivele të reja zhvillimi. Në qytet  do të krijojmë parkun industrial, në mënyrë që investimet e vendit dhe të huajat  gjatë katër  viteve që vijnë të shumëfishohen  dhe të shndërrohet ky park në një gjenerator  të fuqishëm të punësimit të qytetarëve të Patosit” tha kryeministri.

Gjatë fjalës së tij kryeministri tha:

Të nderuar zonja dhe zotërinj.

Qytetarë dhe qytetare të Patosit.

Shpreh nderin dhe kënaqësisë që paraqes sot këtu si kandidat  para jush, një nga bijtë më të shquar të Patosit,  njeriun e suksesit  të këtij qyteti, biznesmenin, menaxherin e shkëlqyer, zotin Dilaver  Kamberi.

Jam këtu për tu angazhuar para jush, se qeveria do të bëjë gjithçka  që me zotin Dilaver, në katër  vitet  që vijnë të shndërrojmë Patosin  në një qytet të zhvilluar, në një epiqendër  të fuqishme të  prodhimit të shërbimeve më të mira.

Zonja dhe zotërinj.

Vëllezër dhe motra.

Fitorja  e zgjedhjeve  shënon për çdo kandidat një sukses të madh , por përmbushja  e misionit  shndërrimi  i këtij suksesi në një sukses për çdo qytetar, për komunitetin, qytetin, komunat në tërësi, është vendimtare për rezultatin për fatin e votës të secilit prej jush.  Jam këtu për tu zotuar, se qeveria ime  do të bëjë gjithçka për të shndërruar sëbashku me zotin Dilaver suksesin  e  8 majit në një sukses për secilin prej jush,  për çdo rrugë dhe rrugicë, për ço familje, për çdo komunitet të këtij qyteti.

Jam këtu për tu zotuar se do të mbështesim fuqishëm  të gjitha projektet që ju do të hartoni sëbashku me zotin Dilaver, për një jetë më të mirë, për punësim, për shërbime më të mira në qytetin tuaj.

Këto katër  vite në qytetin tuaj dhe rrethin e Fierit, ne kemi investuar rreth 400 milion euro dhe kemi ndërtuar dhe rindërtuar mbi 200 kilometra rrugë, nga të cilët 180 kilometra janë rrugë rurale, 27 ujësjellës, 24 qendra shëndetësore, 38 shkolla.  Në energji  janë investuar rreth 250 milion euro, ju garantoj se katër  vitet  që vijnë  në qytetin tuaj, në komunat e Fierit  dhe qytetin e Fierit, qeveria do të investoje 6 herë më shumë, sesa katër vitet që shkuan.

Në këto vite ne kemi financuar 1200 hektarë dru frutore dhe sera, ju garantoj se në vitet që vijnë ne do të financojmë së paku 6 mijë hektarë ullishta, vreshta dhe sera.

Zotimi ynë për ju, është patozi 24 orë ujë në të gjithë territorin e tij, po ndërtojmë kolektorin e ujërave të zeza, si dhe të gjitha rrugët dhe rrugicat e qytetit.  Do të rindërtojmë stadiumin e qytetit në mënyrë që aktivitetet  sportive  të njohin nivele të reja zhvillimi.

Në qytet  do të krijojmë parkun industrial, në mënyrë që investimet e vendit dhe të huajat  gjatë katër  viteve që vijnë të shumëfishohen  dhe të shndërrohet ky park në një gjenerator  të fuqishëm të punësimit të qytetarëve të Patosit.

Vëllezër dhe motra.

Ne vijmë tek ju me alternativën për qytetarin, alternativë  në të cilën ne kemi vendosur  Ju , interesin tuaj, problemet, hallet, dertet tuaja, por edhe vizionin tuaj, përkushtimin tuaj në epiqendër të programit, Patosin dhe Shqipërinë në katër vitet që vijnë.

Ne qëndrojmë, ne besojmë se me besimin e madhe tek ju, tek puna juaj, tek përkushtimi juaj, ne do të arrijmë sëbashku  të shndërrojmë Patosin, të shndërrojmë Shqipërinë, në qytetin dhe vendin më të zhvilluar në vitin 2017.

Besimi ynë bazohet para së gjithash tek aftësitë dhe përkushtimi juaj, tek shpirti juaj punëtor,  tek vendosmëria juaj për të ndryshuar çdo ditë, çdo muaj, çdo orë  jetën tuaj për mire.  Por besimi ynë bazohet dhe në faktin se këto vite, ne sëbashku  kemi realizuar ëndrrat shekullore të shqiptarëve.  Jemi ne qytetarët e këtij vendi, që 20 vjet më parë ishim në honet e historisë, më të izoluarit e të izoluarve, sot mblidhemi këtu si qytetarët të Aleancës së Atlantikut të Veriut, Shqipëria është anëtare  e NATO-s, është vepra e qytetarëve shqiptare.  Në mundin, djersën, përkushtimin tuaj, reformat e qeverisë, qëndron akti madhor i anëtarësimit në NATO, sot Shqipëria është më e sigurtë se kurrë në  tërë ekzistencën e saj mijëra vjeçare.   Jemi  po ne burrat dhe gratë e këtij sheshi,  djemtë  dhe vajzat e Patosi dhe të mbarë Shqipërisë që këto vite ia dolëm nga njerëzit të rrethuar me tela me gjemba të lëvizim të lirë në mbarë Europën.

Jemi po ne, qytetarët e mundit dhe të djersës,  dhimbjes  dhe  sakrificave që bëmë që Shqipëria nga një vend që nuk ekzistonte në hartën e turizmit botëror, nga një vend që në vitin 2004 priti e përcolli gjithsej 300 mijë vizitorë, priti vitin e kaluar 3.5 milion vizitorë e turistë, të shpallemi këtë vit destinacioni kryesorë  turistik i botës, të  shpallemi e Bukura e Dheut.

Dhe kjo nuk arrihej kurrë pa mundin tuaj,  pa djersën tuaj , pa lumenjtë  e djersës  dhe të sakrificave të derdhura nga ju dhe reformat e qeverisë, por kjo nuk arrihej kurrë pa shpirtin tuaj  të bardhë e mikpritës.  Ndaj dhe Shqipëria sot është vendi më i mirë në botë për turizmin.

Këto vite,  ishin vite  sakrificash , lodhjesh dhe mundimesh, por  vite të suksesit  të madh ekonomik.  Secili prej  jush duhet  të krenohet  me veten e tij me njeri - tjetrin dhe me  vendin,  sepse për  tre vite me radhë  Shqipëria  ishte vendi  i tretë  apo i katër më i varfër,  i planetit ndërsa  sot është  vendi  me rritje me të madhe ekonomike.  Në këto vite të krizës së madhe që Europa dhe bota ka njohur, në 90 ditët e fundit ju qytetarët  e këtij vendi me mundin, djersën,  punën tuaj  të mrekullueshme me reformat e qeverisë bëtë të mundur që në Shqipëri si në asnjë vend tjetër të ardhurat jo të pakësoheshin,  por të dyfishohen.  Bëtë të mundur  që punësimi jo të pakësohej, por të rritej, rrogat dhe pensionet jo të pakësoheshin, por të ngriheshin dhe të dyfishoheshin, të dyfishoheshin  pensionet dhe rrogat e ulëta, të dyfishohej  rroga mesatare.

Me lodhjen, me mundin, me djersën tonë, ka patur  sukses të vërtetë,  ka shpresë, ka besim,  ka energji,  ka entuziazëm.

Krahas kësaj, krahas këtyre arritjeve, arritje të mëdha të jetës sonë, sot fëmijët tanë kanë të drejtë të ndihen fëmije Europian, sot  Shqipëria  qëndron në rritje të eksporteve dhe vitin e kaluar prodhimi i mundit, djersës,  në fshat dhe qytet shënoi rritjet  më  të mëdha në Europë, me 62%.

Kjo është alternativa jonë e krahas kësaj është alternativa e rrugës  së vetme.  Por çfarë është kjo alternativë  në rrafshin ideologjik. Eshtë rruga e së shkuarës sonë të zezë, kurse në rrafshin social dhe politik të sotëm , cila është kjo rrugë, të dashur miq në këtë takim? Është rruga e mohimit të arritjeve tuaja, rrugë,  e cila do tu mohojë të përçmojë, të poshtërojë, çdo arritje të madhe të jetës suaj.

Sipas kësaj rruge Shqipëria nuk është një vend i lirë, një anëtare e NATO-s, por ka një qeveri fashiste dhe këto deklaratë nuk vijnë  më nga honet e historisë, nga Ramiz  Alia apo bashkëpunëtorët e tij, por nga kryetari i Partisë Socialiste nga tribuna në tribunë . Jo zoti Rama, Shqipëria është anëtare e Aleancës së Atlantikut të Veriut dhe me kontribut të madh cilësor, jo vetëm në lirinë  e vet,  por edhe në lirinë e kombeve të  tjera në mbarë botën.

Sipas kësaj rruge, vizat nuk duhet të hiqeshin. Hap kutitë të lirosh vizat ishte kërcënimi makabër   i rrugës së vetme.  Vizat nuk u futën dot në kuti dhe ju sot jeni  më të denjë së kurrë të lëvizni në Europë, sipas kësaj rrugë, rritja e rrogave dhe pensioneve është vepër  kriminale, sepse ekonomia po falimenton.  Jo orë zotëri vetmitar, apo udhëtar  i rrugës së vetme.  Ekonomia shqiptare është e faktuar sot nga Banka Botërore, Komisioni Evropian, Fondi Monetar Ndërkombëtar,  si ekonomia më dinamike, më entuziaste me vibrante në Europë .

Dhe kjo rritja e rrogave, rritja e pensioneve, nuk i  është vepër kriminale përkundrazi është detyrë, është mision, është qëllim që do ti përmbahemi sa të jemi në pushtet sa herë të na votoni.

Sipas  kësaj rrugë në Shqipëri paska  1 milion të papunë. Le ti pyesim udhëtarët  e rrugës së vetmisë, nga rritet kjo ekonomi?  Kush e rrit këtë ekonomi?  Kush i bënë këto prodhime?  Kush i nxjerr këta minerale? Këta  janë  këta të padukshëm?   Jo zotëri, këto janë shqiptarët dhe shqiptarët që kanë derdhur mundin djersën e tyre dhe ti shoku Rama që nga  platforma në platforme dhe nga sheshi në shesh ju deklaron se Shqipëria ka 1 milion të papunë, të ftoj që të thuash edhe atë pjesën tjetër siç  e thoshte Ramizi, 1 milion të papunë, 1 milion hajdut, 1 milion spiunë.  Këta nuk janë shqiptarët, ore zotëri.

Ju kërkoni ti përçmoni ata, ti përbaltni ata, por shqiptarët janë njerëzit e lumenjve të djersës  mundit, sakrificave, të kthesave  historik ndaj dhe për ne ju jeni të parët, fëmijët tuaj janë të parët, familjet tuaja janë të parët . Qyteti juaj është i pari, Shqipëria është e para.

Ju garantoj ju se me 8 maj do të fitojmë me Dilaver Kamberajn, e nisim një kapitull të ri në historinë e Patosi, në historinë e Shqipërisë.

Rrofshi ju.

Rroftë Patosi.

Rroftë Shqipëria!