Kryeministri Berisha takohet me Kryeministrin turk z.Recep Tayyip Erdogan

-Gjatë këtyre viteve të fundit, investimet direkte turke kanë shënuar një shifër rekord prej 860 milion euro nga 135 milion euro që kanë qenë në 2005

Gjatë qëndrimin në Stamboll, Kryeministri Berisha zhvilloi një takim të përzemërt e miqësor me Kryeministrin turk z.Recep Tayyip Erdogan.

Të dy kryeministrat vlerësuan marrëdhëniet e shkëlqyera që ekzistojnë midis dy qeverive dhe dy vendeve tona. Kryeministri Erdogan i rikonfirmoi edhe një herë Kryeministrit Berisha mbështetjen e plotë të qeverisë turke dhe të vendit të tij për integrimin e plotë të Shqipërisë në NATO. Po bëjmë përpjekje, u shpreh ai, për të inkurajuar investitorët turq të vijnë të investojnë në Shqipëri.
Kryeministri Berisha e njohu Kryeministrin turk me reformat e gjithanshme të qeverisë shqiptare, duke u ndalur në veçanti në arritjet e rëndësishme për krijimin e një klime sa më të favorshme për biznesin dhe mbështetjen e tyre përmes projekteve të rëndësishme infrastrukturore, si parqet industriale etj.

Kryeministri Berisha falënderoi mikun e tij z.Erdogan për inkurajimin që ai dhe qeveria e tij i kanë bërë investitorëve turq për të ardhur në Shqipëri dhe theksoi se investitorët turq po konfirmohen si shumë të suksesshëm në tregun shqiptar.  Ai theksoi gjithashtu se investimet direkte turke kanë shënuar gjatë këtyre viteve të fundit një shifër rekord prej 860 milion euro nga 135 milion euro që kanë qenë në 2005.

Dy kryeministrat rikonfirmuan gadishmërinë dhe angazhimin e tyre personal, si dhe të qeverive të tyre, për të konsoliduar edhe më tej bashkëpunimin e ngushtë në të gjitha fushat që t’i përgjigjet nivelit jashtëzakonisht të lartë të  miqësisë tradicionale mes dy popujve.

Të dy personalitetet diskutuan edhe mbi zhvillimet në rajon duke u ndalur në veçanti në rëndësinë e pavarësisë së Kosovës si kusht thelbësor për sigurinë dhe stabilitetin në Rajon.

Kryeministri Berisha po merr pjesë në punimet e Forumit Ekonomik Botëror për Evropën dhe Azinë Qendrore, që po zhvillohet në Stamboll.