Kryeministri Berisha takon Kryetarin e Partisë Liberale të Kosovës, zotin Gjergj Dedaj

Kryeministri Berisha priti sot në një takim, Kryetarin e Partisë Liberale të Kosovës, zotin Gjergj Dedaj.

Duke falënderuar Kryeministrin për pritjen, Zoti Dedaj vlerësoi arritjet dhe progresin e bërë nga Shqipëria, në këto vitet e fundit, duke vlerësuar në mënyrë të veçante angazhimin dhe kontributin e kryeministrit Berisha në këtë progres.

Zoti Dedaj u shpreh se tashmë edhe Kosova ecën e sigurt në rrugën drejt zhvillimit, duke patur mbështetjen dhe përkrahjen e vazhdueshme të vendeve mike. “Ne jemi te vetëdijshëm për arritjet e Kosovës, si dhe për partneritetin dhe mbështetjen e vazhdueshme që i kanë dhënë Kosovës kryeqendrat, Tirana, Washingtoni dhe Brukseli. Ne këtë aspekt e shohim me mjaft optimizëm edhe marrëveshjen e re mes Kosovës dhe Serbisë” u shpreh zoti Dedaj.

Nga ana  e tij, kryeministri Berisha, përshëndeti dhe përgëzoi për progresin e dukshëm të arritur nga Kosova, në shumë fusha, duke shprehur mbështetjen e tij dhe të qeverisë shqiptare ndaj këtij progresi. “Tashmë – u shpreh kryeministri- ne jemi një komb, i cili e ka kaluar mbijetesën dhe ecën i sigurt drejt së ardhmes.” Gjithashtu, kryeministri shprehu vlerësimin për rolin dhe kontributin e Partisë Liberale të Kosovës për çështjen e Kosovës.

Kryeministri Berisha ritheksoi qëndrimin e qeverisë shqiptare ndaj marrëveshjes së arritur mes Kosovës dhe Serbisë, në Bruksel, duke u shprehur se kjo marrëveshje mundëson përfaqësimin e Kosovës në procesin e integrimit rajonal dhe Europian si shtet dhe vend i pavarur.