Kryeministri Berisha takon Sekretaren e Shtetit për Punët e Jashtme dhe Bashkëpunimin Ndërkombëtar të Marokut

Kryeministri Berisha priti sot në një takim Sekretaren e Shtetit për Punët e Jashtme dhe Bashkëpunimin Ndërkombëtar të Mbretërisë së Marokut, zonjën Latifa Akharbach dhe delegacionin që e shoqëronte.

Zonja Akharbach shprehu kënaqësinë dhe falënderimin për mikpritjen e ngrohtë të rezervuar delegacionit të kryesuar prej saj dhe përcolli përshëndetjet e përzemërta të Mbretit Muhamed VI dhe Kryeministrit Abbas El Fassi. Në këtë takim, Sekretarja e Shtetit shprehu vullnetin e qeverisë së Marokut për zhvillimin e mëtejshëm të marrëdhënieve dypalëshe, si dhe vlerësoi lart arritjet transformuese të Shqipërisë.

Nga ana e tij, Kryeministri Berisha e cilësoi vizitën si kontribut të çmuar në marrëdhëniet e shkëlqyera dypalëshe, si dhe shprehu konsideratat më të larta për reformat e ndërmarra nga Mbreti dhe qeveria e Marokut në modernizimin e vendit. Kryeministri falënderoi Sekretaren e Shtetit për mbështetjen e dhënë në UNESCO, për përfshirjen e Beratit në fondin e trashëgimisë kulturore botërore.

Më tej, kryeministri Berisha bëri një ekspoze të reformave të ndërmarra nga qeveria shqiptare në rrugën e integrimit evropian, potencialet e zhvillimit ekonomik të vendit si dhe ftoi investitorët marokenë të marrin pjesë në projektet e zhvillimit infrastrukturor, energjetik, turizëm dhe fusha të tjera me interes dypalësh.

Në takim u diskutua ndër të tjera edhe për bashkëpunimin e Shqipërisë dhe Marokut në fushën e marrëdhënieve ndërkombëtare shumëpalëshe, përfshirë në kuadër të Bashkimit për Mesdheun dhe Dialogut Mesdhetar të NATO-s, Konferencës Islamike dhe organizatës së Frankofonisë. Kryeministri Berisha foli ndër të tjera për situatën në rajon dhe progresin e stabilitetit dhe paqes në Ballkan, ku Kosova luan një rol të veçantë në këtë kuadër. Nga ana e saj Sekretarja e Shtetit, Znj. Akharbach vlerësoi rolin e Shqipërisë si faktor stabiliteti në rajon.