Kryeministri Berisha takon Wolfgang Grossruck, Zëvendëspresident i Asamblesë Parlamentare të OSBE-së

- Zoti Grossruck, pasi  falënderoi për pritjen e ngrohtë dhe miqësore e uroi kryeministrin  Berisha për fitoren e Partisë Demokratike dhe të koalicionit që ai drejton në zgjedhjet  8 majit, në veçanti për fitoren e koalicionit “Aleanca për Qytetarin”, e kandidatit të tij zotit Lulëzim Basha, në bashkinë e Tiranës, duke u shprehur njëkohësisht se këto zgjedhje kanë qenë një moment i rëndësishëm për demokracinë në Shqipëri.

Kryeministri Berisha priti sot, në një takim Wolfgang Grossruck, Zëvendëspresident i Asamblesë Parlamentare të OSBE-së.

Pasi i uroi përzemërsisht mirëseardhjen, Kryeministri Berisha e falënderoi zotin Grossruck për  interesin e vazhdueshëm që ai tregon ndaj Shqipërisë dhe popullit shqiptar, si dhe kontributin e vazhdueshëm që ai ka dhënë në forcimin  e marrëdhënieve mes dy vendeve, por edhe në promovimin e imazhit të Shqipërisë në Austri dhe në Evropë dhe në nxitjen  e interesit të investitorëve  e publikut austriak ndaj vendit tonë.

Zoti Grossruck, pasi  falënderoi për pritjen e ngrohtë dhe miqësore e uroi kryeministrin  Berisha për fitoren e Partisë Demokratike dhe të koalicionit që ai drejton në zgjedhjet  8 majit, në veçanti për fitoren e koalicionit “Aleanca për Qytetarin”, e kandidatit të tij zotit Lulëzim Basha, në bashkinë e Tiranës, duke u shprehur njëkohësisht se këto zgjedhje kanë qenë një moment i rëndësishëm për demokracinë në Shqipëri.

Më tej, zoti Grosruk dhe delegacioni që e shoqëronte, i cili përbëhej nga një numër profesionistësh, intelektualësh të fushave të ndryshme dhe përfaqësues të biznesit austriak  vlerësuan arritjet e jashtëzakonshme të reformave të qeverisë shqiptare, gjatë kësaj periudhe dhe u interesuan për mundësitë e shumta që Shqipëria ofron për biznesin e huaj dhe investimet.

Kryeministri Berisha i njohu miqtë austriakë me potencialet  e mëdha që Shqipëria ofron në fusha si ajo e turizmit, e prodhimit të energjisë elektrike, nga burimet ujore, ndërtimin e infrastrukturave të rëndësishme, si dhe me klimën më të favorshme që qeveria shqiptare ka ndërtuar gjatë kësaj periudhe për biznesin dhe investimet, si regjistrimi on line përmes sistemit One Stop Shop, e- taksa, e-dogana, prokurimet elektronike, etj.

Në takim u vlerësua gjithashtu bashkëpunimi i shkëlqyer mes Shqipërisë dhe Austrisë dhe qeverive të dy vendeve në shumë fusha, si dhe u vlerësua fakti që investimet austriake zenë vendin e trete për sa i përket investimeve te huaja ne Shqipëri, në sektorë shumë të rëndësishëm si ai bankar, hoteleri  turizëm, etj.