Kryeministri Sali Berisha merr pjesë në përurimin e Qendrës së Dokumentacionit dhe Informimit Europian

Sot paradite, Kryeministri Sali Berisha mori pjesë në ceremoninë e përurimit të Qendrës së Dokumentacionit dhe Informacionit Evropian pranë Ministrisë së Integrimit Evropian. Në këtë ceremoni ishin të pranishëm ministria e Integrimit Arenca Trashani, ministri i Punëve të Jashtme Besnik Mustafaj, ministri i Mjedisit Lufter Xhuveli dhe ambasadori i Delegacionit të KE-së në Tiranë zoti Lutz Salzman. Ngritja e kësaj Qendreje u mundësua me mbështetjen teknike dhe financiare të BE-së, në kuadër të programit Cards.

Në përshëndetjen e tij, Kryeminsitri theksoi ndër të tjera:

"Integrimi europian është projektuar, imagjinuar dhe programuar nga shqiptarët si e ardhmja e tyre më e shkëlqyer. Në këtë aspekt, unë i siguroj qytetarët shqiptarë që axhenda e qeverisë që unë kryesoj është axhenda e integrimit të Shqipërisë në BE dhe NATO si përparësitë tona më kryesore. Qeveria është e vendosur të bëjë çdo përpjekje, të ndërmarrë të gjitha reformat si instrumentat e vetme për të realizuar projektin e integrimit.

Natyrisht, projekti i integrimit është në radhë të parë përgjegjësi direkte e qeverisë, pasi është ajo që duhet të ndërmarrë reformat e nevojshme. Por ky projekt është shumë më i gjërë sesa një axhendë e qeverisë. Ai është axhendë e shoqërisë shqiptare në tërësi dhe e të gjitha forcave politike në vecanti. Ndaj dhe në këtë kontekst është jetike që të mund të bashkëpunojmë me të gjithë ata që integrimin europian e kanë projekt të tyre. Në këtë mënyrë, jam i sigurtë se Marrëveshjen e Stabilizim Asocimit, që pritet të nënshkruhet së afërmi, do të mund ta shndërrojmë në sukses, në një "udhërrëfyes" drejt integrimit europian. Po kështu Plani i Veprimit për Anëtarësim do të jetë udhërrëfyesi për në NATO.

Në këtë kontekst, qendra që përurojmë sot ka një rëndësi shumë të madhe që u mundëson qytetarëve shqiptarë të mësojnë për përgjegjësitë e tyre në procesin e integrimit. Me informacionin që ajo ofron, i njeh qytetarët shqiptarë me të gjitha përfitimet e tyre nga ky proces, me "acqui communitaire" dhe legjislacionin. Procesi i informimit është vendimtar për t'i shndërruar qytetarët shqiptarë në qytetarë europianë. Ndaj dhe i ftoj punonjësit e Ministrisë së Integrimit dhe të kësaj qendreje të bëjnë çdo përpjekje për të arritur me informacionin e saj tek çdo qytetar i Shqipërisë.

Gjithashtu dëshiroj të falenderoj ambasadorin Saltzman, i cili ndodhet në fund të misionit shumë të suksesshëm të tij në Shqipëri. Ambasadori Saltzman ka dhënë një kontribut të madh, sëbashku me kolegët e tij të Komisionit Europian, me ekipin e negociatave të KE-së të kryesuar nga zoti Priebe, me komisionerët dhe drejtuesit e KE-së në përpjekjet tona për integrim. Ambasadori Saltzman e mbyll misionin e tij në Shqipëri me sukses të plotë. Vendi bëri rotacionin paqësor të pushteti, dëshmi kjo e një maturiteti real të shoqërisë shqiptare në rrugën e demokracisë dhe procesi i reformave është në rrugën e zhvillimit. Duke ju shprehur mirënjohjen për kontributin që keni dhënë, ju siguroj se mbetem jashtëzakonisht i vendosur që integrimi, si ëndrrën më të bukur për të ardhmen e shqiptarëve, të përpiqemi ta shndërrojmë sa më shpejt në realitet. Faleminderit edhe për këtë dhuratë shumë të çmuar dhe kontributin që keni dhënë, zoti ambasador, në misionin tuaj në Shqipëri".