Kuçi: Kosova në Bërdo do paraqitet si shtet

Prishtinë, 18 mars, NOA - Kosova do të përfaqësohet në konferencën e Bërdos si një shtet i barabartë me të tjerët dhe jo në kuadër të UNMIK-ut, siç pretendojnë zyrtarët serbë.

Këtë e ka konfirmuar zv/kryeministri kosovar, Hajredin Kuçi, sipas të cilit, në takimin e planifikuar më 20 mars, në Bërdo të Sllovenisë, Kosova mund të përfaqësohet vetëm si shtet i barabartë me vendet tjera.

Kosova do të përfaqësohet si e barabartë kudo në forume ndërkombëtare. Edhe në rastin e takimit të Bërdos, afër Kranjit, jam i bindur se kryeministri i vendit do ta ketë përfaqësimin e shtetit të Kosovës në mënyrë dinjitoze dhe të barabartë me të gjitha shtetet tjera pjesëmarrëse në atë takim, thotë Kuçi lidhur me një fakt të tillë.

Nga ana e saj, Sllovenia po vazhdon përpjekjet diplomatike për organizimin dhe përfaqësimin e të gjithë liderëve të rajonit në konferencën e Bërdos.

Por pjesëmarrja e Kosovës si shtet është sfiduar nga Serbia, e cila ka kërkuar që emri i Kosovës të shënohet si UNMIK-Kosova, gjë e cila nga Prishtina zyrtare është cilësuar si një propozim i papranueshëm.
n.e/NOA