Kukan uron Presidentin Nishani:Tjetër shans i humbur për bashkim

Kreu i delegacionit për Ballkanin Perëndimor në Parlamenti Evropian, Eduard Kukan, duke komentuar zgjedhjet presidenciale në Shqipëri ka përshëndetur zgjedhjen e Presidentit të ri të Shqipërisë Bujar Nishani, duke shpresuar se ai do të jetë në gjendje të bashkojë dhe të përfaqësojë në mënyrë të pavarur gjithë qytetarët e Shqipërisë dhe t`u shërbejë interesave të tyre.

Megjithatë zyrtari i lartë i Parlamentit Evropian nuk ka kursyer dhe kritikat për mënyrën si u zgjodh Presidenti i ri, duke e konsideruar procesin një shans tjetër të humbur për gjithë forcat politike në Shqipëri për të bashkëpunuar.

Më tej ai shton se pa rezultate të dukshme në përmirësimin e jetës politike, vendi mund të humbasë raste të tjera të rëndësishme. Në këtë kontekst Kukan thekson se sfidat me të cilat ndeshet Shqipëria, kërkojnë bashkëpunim politik.