Kursi i këmbimit tradhton Berishën

 

ADI SHKEMBI

Buxheti i kryeministrit Berisha për këtë vit elektoral tradhtohet nga kursi i dollarit. Megjithëse kreu i ekzekutivit, edhe në mbledhjen e djeshme ka deklaruar, se buxheti i vitit të ardhshëm do të jetë 5 miliardë dollarë, në fakt ai nuk është më shumë se 4.02 miliardë USD. Me një llogaritje të thjeshtë totali i shpenzimeve për vitin 2009 është 382 miliardë lekë të reja, që duke u pjesëtuar me 95 lekë (kursi i këmbimit të dollarit të dy ditëve më parë) del 4.02 miliardë USD. Ndërkohë, për herë të parë shifrën 5 miliardë dollarë të buxhetit të vitit të ardhshëm kryeministri Berisha e artikuloi në muajin shtator, kur kursi i këmbimit të dollarit ishte në kufijtë e 78 lekëve. Me këtë kurs buxheti, në këto nivele të totalit të shpenzimeve shkonte në kufijtë e pesë miliardë dollarëve. Duke folur në mbledhjen e zhvilluar jashtë radhe për miratimin e buxhetit kreu i qeverisë vlerësoi buxheti realizon të gjitha premtimet e qeverisë për rritjen e rrogave dhe pensioneve. "Me shtesën që do të bëhet vitin e ardhshëm, arsimtarët, mjekët dhe infermierët do të ndiejnë dyfishimin e rrogave, pensionistët në qytet do të kenë një rritje të ndjeshme prej 10 për qind, ndërsa pensionistët në fshat do të kenë një rritje prej 20 për qind, e cila garanton përfundimisht dyfishimin e pensioneve të tyre", tha kryeministri, duke theksuar se një rritje të ndjeshme do të pësojë edhe ndihma ekonomike. Nëpërmjet këtij buxheti, sipas kreut të qeverisë do të zhvillohet një politikë sociale konstante, ndërsa administrata shtetërore do t'u 'peshojë' taksapaguesve shqiptarë gjithsej vetëm 6.2 për qind të prodhimit të brendshëm të vendit. Në të njëjtën kohën ai garantoi, se fushata zgjedhore e vitit të ardhshëm nuk do të ngadalësojë reformat në vend, por do të jetë sinonim i reformave. Sipas tij "xhirot e motorit të reformave, shpejtësia e tij, do të njohin tregues shumë më optimal nga sot deri në ditën para zgjedhjeve. Pra, do jeni dëshmitar të një fushate tjetër, e cila do të jetë sinonim i reformave, të një fushate, e cila do të procedojë me vendosmëri me reforma". Nga ana e tij ministri i Financave, Ritvan Bode deklaroi se buxheti i vitit 2009 jep një garanci maksimale se nuk do të krijohen probleme që mund të çojnë në një destabilizim të mundshëm të financave publike, edhe pse është një vit elektoral. "Nëse ritmi i rritjes së të ardhurave nga viti në vit ka qenë të paktën 15 për qind, në vitin 2009 ne kemi programuar një rritje prej 10-11 për qind të së ardhurave të buxhetit. Pra, me qëllim kemi ecur me një marsh më të lartë sigurie nga pikëpamja e të ardhurave. Kjo mund të sjellë tejkalime të qenësishme në buxhet dhe ndoshta në 6 mujorin e dytë të vitit 2009, nëse shqiptarët do të votojnë përsëri këtë maxhorancë, do të krijohet mundësia për të bërë një buxhet suplementar, ku do të rialokohen këto fonde", tha Bode.

Krahasimi i buxhetit suplementar të vitit 2008 me projektbuxhetin e vitit 2009

                        (në milionë lekë)

                2008        2009        Diferenca

TOTALI TE ARDHURAVE    303,783        332,568        28785
Të ardhura nga ndihmat        4,670        6,613        1943
Të ardhura tatimore        276,352        304,771        28419
Nga Tatimet dhe Doganat    209,711        230,168        20457
Nga Pushteti Vendor        15,582        18,412        2830
Nga Buxh. Pavarur        51,059        56,191        5132
Te ardhura Jotatimore        22,761        22,202        -559
TOTALI I SHPENZIMEVE    360,207        382,596        22389
Shpenzime Korrente        257,409        281,884        24475
Personeli            67,959        59,271        -8688
Paga                57,097        51,859        -5238
Interesat            32,580        36,040        3460
Shpenzime Operative         28,643        36,112        7469
Financim i Huaj            225        0        -225
Subvencionet            1,966        2,022        56
Shpenzime per Sigurime        78,673        94,188        15515
Sigurime Shoqerore        67,513        71,655        4142
Sigurime Shendetesore        11,160        22,533        11373
Shpenzime Buxheti Lokal    31,646        36,835        5189
Buxheti lokal (Granti)        16,064        18,423        2359
Shpenzime te tjera         15,442        16,871        1429
Pagesa e Papunesise        1,000        1,000        0
Ndihma Ekonomike        12,042        13,871        1829
Komp per te perndjekurit        1,000        2,000        1000
Kompensim per energjine    1,400        0        -1400
Kompensim i pronareve        500        600        100
Fondi Rez, Kontigjenca        9,900        16,200        6300
Fondi Rezerve i KM        2,400        2,000        -400
Fondi Kontigjence per Politika
Pagash dhe Pensionesh        2,000        8,200        6200
Fond Kontigjence        5,500        6,000        500
Shpenzime Kapitale        94,419        89,512        -4907
Financimi Brendshem        48,848        68,437        19589
Financimi Huaj            45,571        21,075        -24496
DEFIÇITI            -56,424         -50,010        6414